KANATONG mga Kristiyano ilabina kanatong mga Katoliko, usa ka halangdong adlaw nga Domingo sa Pagka-banhaw sa atong Ginoo nga si Hesukristo.
Ang Gugma sa Diyos nga walay kinutuban Iyang gipakita pinaagi sa Iyang Bugtong Anak nga nagpakamatay sa Krus alang sa kaluwasan sa Iyang mga anak gikan sa sala.
Ang pagka-banhaw ni Hesus naghatag kanato og dakong paglaum ug giya nga kita angay magmasaligon sa Anak sa Tawo.
Apan taliwala sa maong pinakasakit nga sakripisyo sa Anak sa Tawo, kitang mga anak sa Diyos ni-anam-anam og palayo Kaniya — kadaghanan kanato.
Dali kitang nihural sa mga pagsulay. Dali kitang natintal sa mga kalibutanong bahandi ug kalipay. Dali kitang nasilaw sa salapi. Dali alang kanato ang paghimo og dautan kaysa maayo.
Ana-a sa atong kinaiya ang pagkamapasigarbuhon. Ug dali kitang masina sa kalampusan sa uban.
Usahay kundili man kasagaran, nahimo kitang laog ug daw-an sa mga grasyang nadawat. Gitukob na sa pagkahakog ang atong kasing-kasing.
Ang uban usab kanato nahimong kuwentador kon makatabang ra gani og gamay. Mapahitas-on na kita kaayo ngadto sa uban.
Niining adlawa, nakapanamin ka na ba sa batasan nga ana-a ka? Imo na ba’ng gitan-aw ang imong mga kaugalingong binuhatan: sakto ba o dili?
Ang atong kinabuhi hinuwaman ug lumalabay lamang. Mahimong kuntento sa grasyang nadawat.
Dili unta kita mag-inabusado kon unsa ang ana-a kita. Pagbaton og pagpasaylo o pangayo ug pasaylo sa uban.
Ug siyempre, atong ipaambit ang pagka-manggihatagon ilabina sa mga pobre ug labing nanginahanglan. Tabangi ang naglisod; ayaw iduot.
Pukawa ang nahitulog nimong kabuotan. Banhawa ang imong pagka-‘maayo’, mga sano ug sana. Hinaot pa.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
