HINGPIT nang gideklarar sa Philippine Atmospheric Geophysical and Astronomical Services Administration ang summer sukad kaniadtong adlaw nga Miyerkulis, Marso 22, 2023 hangtud sa buwan sa Mayo.
Kini ang gitug-an ni Engineer Nards Samar, ang hepe sa weather company sa Bohol.
Matud ni Samar nga opisyal na nilang gideklarar nga sugod na ang summer ug masinati ang mas init ug alimuot nga panahon sa mga mosunod nga adlaw.
Nagkanayon ang PAGASA nga bisan og summer na kinahanglan gihapon motuman ang katawhan sa pagsunod sa precautionary measures nga giluwatan sa Department of Health (DOH).
Gibutyag ni Samar nga niining panahon sa ting-init kinahanglan usab magdaginot ang katawhan sa supply sa ilang tubig.
Matud usab niini nga gamay ra kaayo ang kahigayonan sa ulan apan sa hapon padulong sa gabii adunay masinati sa pat-ak- pat-ak nga pag-ulan apan dili kini magdugay kay tungod lang sa localized thunderstorm. (RTB)
