HUGOT nga seguridad ang gipatuman sa dili mominos sa napulo ka mga pantalan ug usa ka airport sa probinsya sa Bohol aron dili makasulod ang mga karneng baboy gikan sa mga nagkadaiyang lugar ilabi na kadtong apektado sa African Swine Fever.
Dunay ASF Provincial Task Group ang probinsya nga gilangkoban sa kapulisan ug provincial veterinary nga maoy magbantay aron walay makalusot nga mga karneng baboy gikan sa laing lugar.
Sumala pa nga dugay na ang paghugot sa pagpasulod sa mga karneng baboy gikan sa laing lugar sa pagsugod palang sa ASF sa Sugbo ug pinasubay usab sa Executive Order ni Governor Erico Aries Aumentado.
Nasayran nga dunay mga K9 nga mosusi sa tanan bagahe ug adunay mga ‘man to man’ nga pagsusi sa mga pagkaon nga mosulod.
Gani dunay mga pagkaon nga bitbit sa mga turista ang wala kalusot sama sa litson, pansit nga adunay sahog nga baboy ug uban pa.
Ang mga masakmit nga pagkaon nga adunay karne ang usahon sa butanganan dayon og chemical ug ang provincial veterinarian na ang magpahigayon sa tukma nga pag dispose niini.
Una niini, dili mominos sa 50 ka kilo na nga inasal ug uban mga kare ug 50 kilos na usab ka mga chicharon ang na dispose na sa lalawigan.
Subay niini, si Gob. Aumentado padayon nga niawhag sa mga turista nga dili magdala og mga karne pasulod sa ilang probinsya tungod kay dili gayud kini makalusot. (RTB)
