NAALARMA karon ang bugtong-babaye nga bokal sa unang distrito sa Bohol subay sa giingong pagsaka sa ihap sa teenage pregnancies sa nasud.
Sumala pa ni Bokal Nanay Lucille Yap-Lagunay nga hapit pito ka babaye nga nag-edad og 14 anyos ug mas ubos ang nanganak sa nasud matag adlaw sigon sa bag-o nga pagtuon sa Commission on Population (PopCom).
Nasayran ni Lagunay nga ang pagpanganak sa mga babaye nga nag-edad og 14 anyos paubos nisaka sa pito ka porsyento sa tuig 2021 kompara sa mga niaging tuig 2020 basi sa taho sa Philippine Statistics Authority (PSA).
Sigon sa nakuhang taho sa bokal nga sa tuig 2021, mukabat sa 2,411 ka mga babaye ang nanganak nga gikonsidera nga young adolescents diin nag-edad og 10 hangtod sa 14-anyos.
Dugang ni BM Lagunay nga kini nga numero nagpasabot nga hapit pito ang manganak matag adlaw ug tulo ka pilo nga pagsaka gikan sa tuig 2015 diin 755 lang kini nga age group nga nagsabak. (RTB)
