SUPORTADO sa kongresista sa Segundo Distrito sa Bohol ang libreng farm-to-market transportation sa mga produkto sa mga mag-uuma aron matabangan sila sa nagkataas nga presyo sa mga palaliton.
Sumala pa ni Kongresista Aris Aumentado nga duha ka butang ang angayan nga suportahan. Una mao ang nag-us-us nga ekonomiya ug ang ka walay sakyanan sa kabukiran paingon sa kalungsuran o syudad nga kargahan sa mga gulay kon agricultural products.
Gidugang pa niya nga mamahimo usab maghatag ayuda o kaha diskwento ang nasudnong pangagamhanan ngadto sa mga mag-uuma sa pag-angkat sa produkto.
Giingon ni Aumentado nga padayong nagkataas ang presyo sa mga nag-unang palaliton tungod sa epekto sa mga miaging bagyo ug sa African swine fever (ASF) karon.
Sa laing bahin, nanawagan usab og imbestigasyon sa pagsaka sa presyo sa mga baboy ang kongresista.
PORK PRICE MANIPULATORS
Mahimong kasuhan ang si bisan kinsa nga magpahimulos niining panahon sa CoViD-19 pandemic ug African swine fever (ASF) tungod sa gitawag nga economic sabotage.
Sumala pa sa kongresista sa segundo distrito sa Bohol Aris Aumentado nga dili maayong pahimuslan ang katawhan kinsa anaa karon sa kalisdanan tungod sa problemang gisagubang.
Migawas ang pamahayag ni Aumentado human giaprobahan ni Presidente Rodrigo Duterte ang paghulma sa usa ka task group aron mangita sa mga profiteer, hoarder ug smuggler sa mga produktong pang-agrikultura.
Gipasabot ni Aumentado nga pangunahan kini sa Department of Agriculture (DA) ug Department of Trade and Industry (DTI) inabagan sa mga masunod nga ahensya: Department of Justice (DOJ); Department of the Interior and Local Government (DILG); National Bureau of Investigation (NBI); Philippine National Police (PNP); Bureau of Customs (BOC); Philippine Competition Commission (PCC); National Security Council (NSC); ug National Intelligence Coordinating Agency (NICA).
Subay niini, nanawagan ang kongresista sa katawhan nga kon dunay magpahimulos pinaagi sa pagpasaka sa presyo sa mga karneng baboy ug uban pa, mamahimo kining mutaho sa pinakadool nga buhatan sa departamento sa agrikultura ug PNP. (RTB)
