SAYOD kita nga ana-a ang mga paningkamot aron mapapas ang korapsyon sa atong katilingban.
Apan sama kaniadto ug karon, napakyas gihapon ang katawhang Pilipinhon.
Ang numero-unong gilauman nga makaputol sa korapsyon sa gobyerno mao ang pagpili og mga tarong nga lider.
Ana-a ang mga kampanya batok sa hugaw nga liderato apan sa kanunay, wala nagmalampuson.
Ang dakong pangutana: nganong kanunay man pakyas?
Kay nahimong tradisyon ang pagpili panahon sa Eleksyon, nga kon kinsa ang dako og salapi nga itunol, kon kinsa ang mas gamhanan ug impluwensyado o ilado, mao ang kasagarang modaug.
Kon dili na man gayud maibot ang maong naka-ugat nga tradisyon, kini na lang ang lagmit bugtong paagi: pahaiton ang ngipon sa balaod ug ipahamtang ang timbang nga hustisya.
Unsaon man pagpahamtang sa hait nga pamalaod ug patas nga hustisya?
Magsugod kini sa pagreporma sa maong mga ahensya nga nagatutok niini.
Sa pagpahamtang niini, kinahanglan ana-a gayuy ma-sampulan. Ipabati gayud ang ngipon sa balaod ug ang makatarunganong hustisya. Walay kadugo-ay o kapamilyahay, walay partiduhay ug walay amiguhay.
Kay kon dili mahimong epektibo ang maong mga solusyon, kutob na lang sa bagulbol ang tanan, walay kausaban nga mahitabo.
Ug pabiling ut-ot ang ekonomiya sa Pilipinas ug sa kadaghanan sa mga Pinoy. Dili kana ang gipangandoy sa mga anaay tarong nga paminsar.
Ikaw Sano ug Sana, unsa may pinaka-epektibong solusyon batok korapsyon sa nagkadaiyang ahensya sa gobyerno?
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
