DUNAY basehanan ang paghimo sa ronda ug pagpanakop sa kapolisan didto sa Tubigon Cockpit Arena (TUCA) niadtong Enero 2, 2023.
Kini segun sa resulta ug conclusion sa imbestigasyon sa fact-finding team nga giumol ni governor Aris Aumentado aron pag-imbestigar sa kontrobersiyal nga ronda sa TUCA.
Matod ni Atty. Handel Lagunay, chairman sa fact finding team nga dunay rason ang pagronda tungod kay ang maong buwangan walay lisensiya, walay prangkisa, walay SP resolution nga nagtugot nga magpahigayon sa sabong niadtong petsaha.
Ang mao usab nga adlaw (Enero 2) wala ideklara isip legal holiday segun sa gilatid ubos sa PD 449.
Ikaduha matod niya dunay presumption of regularity sa pamaagi sa kapolisan pagpahigayon sa maong ronda.
Apan kon duna may naagrabyado sa mga gihimo sa kapolisan atol sa paronda, matod ni Lagunay nga ang hingtungdan mahimong mo-file sa tukmang complaint batok sa raiding team aron mahatagag pagtagad ang ilang reklamo.
Dugang niya nga ang investigation report nasumite niadtong Pebrero 8 sa buhatan ni governor Aris Aumentado.
Kini gihiusa sa report ni retired General Art Evangelista ug retired General Jonas Ejoc.
Ilang girekomendar kang governor Aumentado nga isangon ngadto sa proper authority sama sa Office of the Provincial Prosecutor ang pagsuta kon aduna ba gyoy probable cause nga nahimo nga mga kalapasan kay nagsunod lang sila sa katuyoan nga gitahas kanila sa gobernador nga mao ang paghimo og fact finding investigation.
Kahinumdoman nga 14 nadakpan sa maong raid apil ang kanhi bise mayor sa Tubigon nga si Virgilio Fortich ug kini nisangpot sa pagkasamad sa daghang mga sugarol human nanagan ug nangambak sa kural nga dunay bildo, dunay natuhog sa kabilya, nangasamad sa bildo ug sin ug duna pay wa makompirmar nga taho nga matod pa dunay usa nga namatay. (RTB)
