GIHUPAY sa Department of Public Works and Highways (DPWH) ang kahadlok sa giingong nangliki nga bahin sa bag-ong Clarin Bridge sa lungsod sa Loay nga maoy mipuli sa karaang taytayan nga nahugno sa niaging tuig nga mipatay sa upat ka mga tawo.
Si Engr. Magiting Cruz, hepe sa Third Engineering District sa DPWH, nipasalig sa publiko nga “hingpit nga luwas” ang taytayan alang sa paggamit sa tanang matang sa mga sakyanan.
Ang opisyal sa DPWH niluwat sa maong pamahayag human ang mga netizen nipahibawo sa dayag nga “liki” sa usa ka tumoy sa taytayan.
Gipasabot ni Cruz nga kini usa lamang ka separation tali sa konkretong tulay ug sa asphalt bridge approach.
Matod ni Cruz, ang dayag nga panagbulag tali sa bridge approach ug sa aktuwal nga tulay kay “normal,” kay ang mga materyales nga naglangkob sa approach wala man maunsa.
Hinuon si Cruz niingon nga ang bahin sa taytayan i-adjust sa kontraktor kinsa obligado pa nga mohimo og mga pagpaayo sa istruktura ubos sa “warranty.”
Siya midugang nga sa higayon nga ang pamaagi hingpit nga mohusay ug molig-on sa umaabot, kini mahimong layered sa konkreto inay aspalto.
Ang pagtukod sa bag-ong Clarin Bridge nga nagdugtong sa mga lungsod sa Loboc ug Loay nagsugod niadtong 2018.
Hapit na kini mahuman niadtong Abril 2022, sa dihang nahugno ang karaang Clarin Bridge tungod sa katiguwangon niini ug sa kabug-at sa karga.
Gitukod ang taytayan sa tuig 1970 ug usa sa mga imprastraktura nga natay-og sa 7.2-magnitude nga linog nga miigo sa Bohol niadtong 2013.
Ang pagkahugno nag-aghat sa DPWH sa pagpadali sa pagkompleto sa bag-ong taytayan ug pag-abli niini sa publiko niadtong Mayo, 2022. (RTB)
