ANG mga mag-uuma sa lungsod sa Clarin nakadawat og P6,250,000.00 nga kantidad sa pagpahiuli sa ilang pasilidad sa irigasyon gikan sa National Irrigation Administration (NIA).
Ang maayong balita, alang sa Cabog Communal Irrigation System nga natugyan na niadtong Pebrero 16, 2023, sa Cabog IA didto sa simple nga seremonyas sa Cabog IA Bunkhouse, lungsod sa Clarin.
Kini nga proyekto nakabenepisyo sa 23 ka mga mag-uuma nga miyembro sa Cabog Methodical Irrigators Association Inc. nga adunay kinatibuk-ang 25 ka ektarya nga umahan.
Atol sa Inauguration and Turnover ceremony, si Cabog Methodical Irrigation Association President Reynante A. Lauro nipadayag sa iyang pasalamat sa NIA.
“Mapasalamaton kaayo mi sa NIA nga kami nahatagan og dugang pundo para sa pag-ayo sa among irigasyon ug nadugangang pa ang among konkretong kanal patubig, matud pa ni Lauro.
Gipasalig usab ni Lauro sa NIA nga kini nga proyekto sa irigasyon mamentinar og maayo.
“Ako, ug ang akong mga kaubang myembro sa IA, nagapasalig nga kini among ampingan arun molungtad ang maong proyekto nga gihatag sa NIA,” dugang pa ni Lauro.
Ang mga trabaho nga gihimo niining P6.2M nga proyekto naglakip sa usa ka Dam, 10 ka turn-out gates, 14 ka thresher crossings, duha ka 70-meter cut & covers, tulo ka 120-meter rubble protection, usa ka IA bunkhouse, ug 1,451 metros nga concrete line canals.
Si Clarin Mayor Eugeniano E. Ibarra, kinsa mitambong usab sa maong kalihukan, mipahayag sa iyang suporta alang sa produktibidad sa mga mag-uuma.
Ang mga sakop sa Cabog Methodical IA, Baranqay Kapitan Rosalino S. Polinar Jr., CIS Project-In-Charge Bienvenido T. Seroje, IDS Chief Joy Mendoza, ug Institutional Development Officer Janice Logroño adunay importante usab nga bahin sa kalampusan sa turnover ug inagurasyon sa proyekto. (Elvira Bongosia/PIA7 Bohol)
