KON ang kalamposan maga-agad sa tabang ug pagbulig sa atong isigikatawo, angayan lamang nga daghan kita ug mga kaila. Apan dili tanang tawo ang atong magustohan. Ang matag tawo dili usab magkagusto kang bisan kinsa. Dili nato makuha ang tabang ug pagbulig sa uban kon dili kita nila magustohan. Kon adunay panahon nga kita dili makagusto sa atong isigkatawo, sila usab mahimong dili makaangay kanato. Anaa kanato ang mga hinungdan. Mahimong tungod kay dili kita mahigalaon. Ang mga mug-uton, mahal ug pahiyom ug dili managad, makapa-aghat sila ug dili maayong katalian. Ang kalamposan dili sayon kab-oton. Adunay daghang mga hinungdan nga mapakyas ug dili matuman.
Dili mahimong kanunay nga mag-inusara. Ang kalamposan nanginahanglan ug kauban, gani mag-agad kini sa pagbulig sa mga kaubanan. Bisan sa atong kasinati-an, kita nakabantay nga aduna gayoy magpaluyo sa mga kalamposan ug kapakyasan. Ang atong maangkon mag-agad kon gi-unsa kita pagbulig ug pagtabang sa uban. Ayoha ug tagad ang imong isigkatawo ug makabaton ikaw ug daghang mga kaila ug higala. Sila maoy mahimong kalamposan. Dili sayon nga mobaton ug higala ug kahigalaan. Bunga kini sa buta nga pagsalig sa usag-usa. Usa kini ka pagbati, nagagikan sa hunahuna, dinihogan ug puno sa emosyon nga gibugkos sa gahum ug kusog.
Ang panaghigala usa ka katali-an nga mohinog paglanat sa mga higayon. Mamugna kini tungod sa kinaiya, tinahoray ug panaglambigit sa usag-usa. Dili usab kini mapalit ug kantidad. Kon daghan ang naghunahuna nga mapalit ang panaghigalaay, sayop ang maong pagtoo. Nag-usik-usik lamang kini ug salapi. Gawas pa, makamugna usab kini ug kahiubos. Matud pa, sa usa ka libo ka mga kaila, lisod kaayo makakita ug usa ka tinuod ug suod nga higala. Mahimong adunay suod kaayo, apan mahimong dili gihapon siya tinuod nga higala. Ang tinuod nga panaghigala-ay masayran ug masuta dili tungod sa mga pabor ug tabang nga madawat.
Malambigit ang kalamposan ug kalambuan pinaagi sa katali-an nato sa mga kadugo ug paryenti, mga silingan ug kaila. Mahimo usab nga kini sila maoy kapakyasan sa atong mga tumong ug panglantaw sa kinabuhi. Ang pagdumala sa usa ka kompaniya dili mahimong molampos kon walay pagbulig sa mga kauban, mga kawani ug mamumuo. Ang tag-iya ug tulunghaan pakyas sa iyang katuyu-an kon dili mobulig ang mga magtutudlo, mga tinun-an ug emplyado. Ang mga namaligya sa kamerkadohan dili kahalinan kon walay suki nga mamalit sa ilang gipangtinda. Ang mga kalihokan, kon walay mga mobulig nga kaubanan, kon dili maka-abanti sa mga katuyu-an, mosangpot gayud sa kapalpakan.
