Ni Wilson Auguis Subrio
TRINIDAD, Bohol — Atol sa kasaulogan sa Adlaw sa mga Kasing-kasing kaniadtong Martes, Pebrero 14, gi-ablihan sa Kagamhanang Probinsyal ilawom sa liderato ni Gob. Aris Aumentado ug Bise-Gobernador Victor Balite ang Botika sa Katawhan ug Capitol Medical Clinic nga nahimutang sa karaang DPWH building kilid sa bag-ong Kapitolyo, sa siyudad sa Tagbilaran.
Mao kini ang gipaambit sa gobernador pinaagi sa iyang Facebook post sa maong adlaw.
“Kini gitukod aron mapakusgan pa ang atong paghatag og serbisyo medikal sa katawhan ug mahatagan og pagtagad ang kalawasan sa mga trabahante sa Kagamhanang Probinsyal,” matud pa sa maong Facebook post.
Ang maong botika moserbisyo sa kadaghanan ilabina sa mga trabahante sa Kapitolyo ug mga higalang indigent nga nanginahanglan og tambal.
Aron mahatagan og referral sa Constituency Services Section (CSS) nga nahimutang sa Ground Floor sa Kapitolyo, dalha lang ang inyong reseta.
Ug kon nawala oh nahabilin ang reseta, puwede nga mangayo og reseta sa Capitol Medical Clinic aron mahatagan usab og referral sa CSS.
Samtang ang Capitol Medical Clinic mo-serbisyo sa mga empleyado sa Kagamhanang Probinsyal ug sa mga emergency situations nga posibleng mahitabo sulod sa Capitol compound.
Ang pag-abli sa Botika sa Katawhan ug Capitol Medical Clinic nahisulod sa saad ni Aris nga unahon ang interes sa mga Bol-anon.
