NAGPADAYON sa lalawigan sa Bohol ang pagtaas sa gidaghanon sa mga kaso sa dengue sa unang duha ka bulan ning tuig 2023.
Ang datus sa Provincial Epidemiology and Surveillance Unit (PESU) nagpakita nga ang ihap sa mga kaso sa sakit nga dala sa lamok gikan Enero 1 hangtod Pebrero 4, 2023 nisaka sa 50 porsyento.
Hinoon ang ihap sa mga kaso misaka sa 199 gikan sa 133 sa parehas nga panahon kaniadtong 2022.
Sa talaan sa PESU, labing daghang kaso sa dengue ang natala sa Talibon nga niabot og 35 ka kaso. Gisundan kini sa Clarin, 16; Tagbilaran City, 16; Candijay, 10; ug Inabanga, 8.
Niadtong Hulyo 2022, ang Provincial Health Office nipadayag na og alarma sa pagsaka sa kaso sa dengue.
Ang mga kaso sa dengue misaka og 1049% sa unang bahin sa 2022 kon itandi sa gidaghanon sa mga kaso sa miaging tuig.
Nagpadayon ang lokal nga mga awtoridad sa panglawas sa pagpahinumdom sa publiko nga ang mga impeksyon sa dengue dali nga mapugngan kung ang mga komunidad mag-obserbar sa mga preventive measures sama sa 4S, ang estratehiya sa departamento sa kahimsog batok sa pagkaylap sa sakit.
Ang plano sa 4S naglakip sa pagpangita ug pagguba sa mga lugar nga gipasanay sa lamok, pagsiguro sa pagpanalipod sa kaugalingon, pagpangita og sayo nga konsultasyon, ug pagsuporta sa fogging ug pag-spray sa mga hotspot nga lugar.
Sa sayo pa, ang PHO Provincial Dengue Program coordinator nga si Saniel Leonidas niingon nga ang mga indibiduwal kinahanglan usab nga likayan ang pagpabilin sa stagnant nga tubig. Kung dili kini malikayan, ang gitipigan nga tubig kinahanglan kanunay nga tabunan.
Ang dengue kasagarang mapasa pinaagi sa lamok nga Aedes aegypti, nga mosanay diha sa stagnant nga tubig.
Apan, namatikdan ni Leonidas nga ang itlog sa lamok mabuhi sulod sa usa ka tuig nga walay tubig ug bisan ubos sa direktang kahayag sa adlaw ug kon malubog na usab sa tubig, mapusa pa kini.
Matod niya, kinahanglang limpiyohan pag-ayo ang mga sudlanan sa tubig nga gigamit sa pagpundo aron dili motapot niini ang mga itlog sa lamok. (RTB)
