UNSAY dangatan sa tawo kon dili maningkamot nga mabuhi? Diha bay mga higayon sa inyong pagpamalandong nga misantop kini nga pangutana? Ang tawo angay gayud nga molihok aron makakaon. Ang atong mga katigulangan gadasig gayud nga magkugi ug magbudlay aron adunay makaon. Daghang mga higayon nga wala sa atong hunahuna ang mga pagdasig sa atong ginikanan ilabi na panahon sa atong pagkabatan-on. Apan pag-abot sa tukmang mga adlaw makit-an nato ang kabililhon sa ilang mga tambag ug pagbadlong. Moagi gayud ang tawo sa mga hagit ug pagsuway sa iyang pagpuyo ug pagpakabuhi dinhi sa kalibotan.
Kon dili lang unta kita mokaon, dili na kinahangalan nga maningkamot. Apan bisan pa nga diha pa kita sa sabakan sa atong inahan, aduna nay gutlo sa atong kinabuhi nga mokaon ug pakan-on. Maoy hinungdan nga naanad na ang tawo nga mokaon gikan pa sa iyang pagkahimugso. Nasinandan ug nabatasan, nahimong kabahin sa kinabuhi ug pagpakabuhi. Tungod niini, nahimo kining dugokan ug hinungdan sa paningkamot. Ang panginahanglan sa pagkaon misangpot ug nahimong sukdanan sa kahimtang-kabus ug adunahan. Nakamugna ug sumbanan sa duha ka hut-ong sa mga tawo sa katilingban. Nakahimo ug utlanan.
Mahimong dili tanan ang nakasinati ug kahamugaway. Sama ra usab nga adunay mga adunahan nga wala makasuway ug kakabus. Apan kadtong gikan sa kalisod nga nakatagamtam ug kaharuhay, mobati na sila ug kahadlok ug kakulba nga mahibalik sa ilang nasinating pag-antos. Ang mga kabus ug timawa padayon nga nangandoy nga makalingkawas sa ilang dili mayong kahimtang. Padayon ang ilang paningkamot ug panimpalad. Ang kahimtang sa kinabuhi hinimo sa tawo. Nag-agad kini sa iyang mga lakang ug pamaagi nga makahaw-as ug makabadbad sa dili maayong pagkabutang. Usa kini ka paghukom, nunot sa hugot nga baroganan.
Dinhi mahimong usa ka hagit ang pagpaningkamot. Ang atong kinabuhi puno sa mga dayandayan sa kalipay ug kaguol. Mga kasinati-an kini nga kabahin sa atong nanglabay ug kagahapon. Ang kalipay ug kasakit maoy bunga sa mga nangagi nga nagdala ug kambulokon nga pagpuyo. Lunsay ug matam-is ang kalipay nga dali kaayong buntogon sa mga kasakit. Ang ahat nga katumanan sa mga pangandoy makahatag ug suliran ug sakit sa balati-an. Luyo niining tanan, ang tawo walay katagbawaan. Dili moundang sa pagpaningkamot. Taliwala sa mga pagsuway ug kapakyasan, pabilin gihapon nga dasig. Walay makapalong sa kainit sa paglaum. Makadasig ang maningkamot.
