SI Lina usa ka manikyurista sa usa ka local beauty parlor. Duha iyang anak, 4 ug 2 years old. Molarga na unta iyang bana pa-abroad sa dihang nadisgrasya kini ug namatay. Karon, si Lina wa nay income kay pandemic man.
Di pud matawag nga buotang Boholana si Lina. Balikas here, balikas there, balikas everywhere. Nakasamut sa iyang problema. Pero wa pud siyaý kalibutan og unsay angayng buhaton. Mao ra pud nay iyang diskarte. Di pud ta ka-basul niya.
Sa laing bahin, si Amie bugtong anak sa iyang single mom. Pinaangkan sija. Pero iyang mama kasaligan, himsug, komedyante ug maoy makabibo sa mga panagtapok sa mga kahigalaan ug pamilya. Si Amie naminjo ni Fred karong bag-o, ug kini gikaguol pag-ayo sa iyang mama. Paglabay sa pipila ka adlaw, namatay ang mama ni Amie tungod sa aneurysm. Grabe and kaguol ni Amie.
Tungod kay si Amie usa man ka peer counselor niadtong high school pa siya, nisantup sa iyang hunahuna nga kung magpadaug siya sa kaguol, dili siya makatabang sa uban. Naay moingon nga “Time heals”; apan sa pagkatinuod, ang labing importanteng pangutana mao kini, unsay imong gibuhat sa imong time. Dinhi nahigut ang imong pagkaayo o pagkasakit. Lakip na niini ang pagbangotan. Gitugutan ni Amie ang iyang kaugalingon nga mobati sa kasubo ug kasuko, aron ipadayag ang mga pagbati nga gihambin sa pamaagi nga dili makapasakit sa uban.
Daku usab og gikatabang ang suporta sa mga higala ug kaparyentehan ni Amie, ug labaw sa tanan, ang iyang lig-ong pagsalig sa Dios. Ang nakapait kay wa pa matapos ang pag-antus ni Amie. Atul sa death anniversary sa iyang mama, naka-move on na unta siya, apan sa kalit lang ang iyang bana nga si Fred mi-collapse ug gideklarar nga dead on arrival sa ospital bisan wa siya’y history sa heart disease.
Kon ikaw pa si Amie, makasugakod kaha kas iyang naagi-an? Di kaha ka dag-on sa tumang kaguol? Makatrabaho pa kaha ka sa maong sitwasyon?
Si Amie nag-antus ug nagbangotan. Apan wa siya magpabuntog sa sitwasyon. Nakat-on siyag pipila ka importante kaayong mga pagtulun-an sa kinabuhi: “Ayaw usiki ang imong panahon ug kinabuhi sa tumang kalooy sa kaugalingon. Ang imong physical ug mental health mao ray imong tinuod nga bahandi. Ayaw kini usiki sa mga negatibong emosyon. Ok ra nang maguol. Apan ayaw hutda imong mental ug physical energy sa mga emosyon. Gaksa ang kausaban. Apan ayaw pagsulay pag-control sa mga butang nga dili nimo ma-kontrol. Dili nimo malipay tanan. Busa ayaw nag sulayi. Ang kahilum ug pag-inusara diha sa pag-ampo dakug ikatabang”.
Salamat, Amie, sa pagpaambit sa mga pagtulun-an. Amping.
