NAGLAUM ang kagamhanang probinsyal sa Bohol nga usa sa mga pilot province para sa Universal Health Care (UHC) nga hingpit nang mapatuman ang programa sa sunod tuig aron mahatagan og mas lapad ug accessible nga libreng healthcare sa publiko.
Matod ni Assistant Provincial Health Office Dr. Yul Lopez, ang Provincial Health Board nga gipangulohan ni Gobernador Aris Aumentado mipatawag sa tigum karong bag-o aron hisgotan ang kahimtang sa UHC ug pagtudlo sa mga opisyal sa mahinungdanong ahensya ug organisasyon nga maoy manguna sa pagpatuman sa programa.
Namatikdan sa opisyal sa panglawas nga ang PHO ug uban pang ahensya nagsugod na sa pagparehistro sa mga residente ug gidestino sila sa mga health center ug mga ospital nga motagana sa ilang mga panginahanglanon ug magtanyag sa mga serbisyo nga libre.
Kadtong mga rehistrado mamahimong benepisyaryo sa PhilHealth “Konsulta Package.”
Ubos sa programa, ang mga indibidwal makakuha og mga checkup, konsultasyon ug bisan tambal gikan sa ilang gi-assign nga healthcare facility o practitioner sama sa mga doktor.
Isip kabahin sa UHC, ang gobyerno nagtinguha usab sa pag-establisar og “Super Health Centers” sa matag munisipyo nga mapuno sa mga ekipo ug maghatag og ambulatory care.
Kini nga mga pasilidad adunay usab mga botika nga maghatag bayad nga tambal.
Gitataw ni Lopez nga ang mga galastuhan alang sa pagpatuman sa programa bayran pinaagi sa “Special Health Fund” nga gimugna pinaagi sa UHC nga balaod ug ubos sa kontrol sa Provincial Health Board. (RTB)
