WALA pa matino sa mga otoridad kon ang P68-million nga shabu nga napalgan sulod sa sakyanan sa Allen, Northern Samar sayo sa nakalabay nga semanaha ihatod ba dinhi sa Bohol.
Ang ilegal nga drugas na-intercept niadtong Martes, Enero 31, 2023 sa police-manned checkpoint sa Barangay Jubasan ug napalgan sulod sa Toyota Vios nga rehistrado sa usa ka taga Bohol.
Ang Philippine Drug Enforcement Agency (PDEA-7) niingon nga ang drayber sa sakyanan nga giilang si Mangayao Mitomara mitug-an nga siya paingon sa Mindanao.
Hinuon wala nila ibaliwala ang posibilidad nga ang kontrabando padulong sa laing destinasyon lakip na sa Bohol.
Samtang si Bohol Provincial Police Office (BPPO) director Col. Lorenzo Batuan kinsa mikompirmar nga ang maong sakyanan rehistrado gyud sa usa ka Bol-anon niangkon usab sa posibilidad nga ang maong drugas gituyo nga ipadala sa Bohol.
Sa sayo pa, si Dauis Vice Mayor Miriam Sumaylo niangkon nga ang gitumbok nga tag-iya sa sakyanan paryente niya nga si Zaldy Sumaylo.
Hinuon iyang giklaro nga ang sakyanan gibawi na sa Global Dominion Financing Incorporated niadtong 2019 ug wala na sa ngalan ni Zaldy sukad niadto.
Sa laing bahin, namatikdan ni Batuan nga ilang gihingusgan pa ang pagpatrolya sa mga entry point sa probinsiya aron mapugngan ang pagsulod sa mga kontrabando partikular na ang illegal nga drugas.
Matod niya nga nagplano sila nga makakuha og dugang mga sniffing dogs nga ipakatap sa mga pantalan sa tibuok isla. (RTB)
