DAGHAN ang mahimong kapanginabuhi-an. Sa panahon karon nga lisud ang kinabuhi, ang matag tawo mihimo sa tanang pamaagi aron mokita ug makakaon. Mahimong magnegosyo ug manarbaho basta lamang nga may ikapalit sa inadlaw nga panginahanglan. Daghan usab ang nanarbaho pinaagi sa kaugalingon (self employed). Kini naglakip sa pagpang-uma, pagpanagat, pagpamuhi ug mga hayopan ug patigayon. Kon ang tawo adunay nakat-unan nga mga kahanas, dili lisod alang kaniya ang pagpangita ug kwarta ug trabaho. Usa na niini ang pagdisinyo, pagpamuhat ug pagpang-ayo ug sapatos. Kini maoy kahanas sa mga sapatero.
Kon maghisgot ug sapatero, dili basta-basta ang ilang abilidad ug kahanas. Ang mga sapatos, sandalyas, tsinilas ug uban pa nga makita sa mga mall ug sapatosan, mugna kini nila. Sa panahon karon talagsa na ang magtini-il. Ang mga katawhan minunot na sa urog ug uso. Kon adunay maayo nga mohimo ug mga disinyo, dali na kayo kini nga himoan ug padron (pattern). Ang pattern nga hinimo, dali kaayo kining mabaligya sa mga sapatosan ug tindahag mga sapataos sa mga mall. Sa laktod nga pagkahisgot, dako kaayo ang kitaon sa mga sapatero. Gawas nga adunay kahanas ug abilidad, dili usab daghan ang tighimo ug sapatos. Dili usab sayon ang moayo ug mga sapatos.
Dili tanang sapatero ang ganahan nga moayo ug sapatos. Mas dali nga maghimo ug bag-ong sapatos kay sa mag-ayo. Tungod kay dili parehas ang mga problema sa mga nagubang sapatos. Adunay guba nga sayon ra kaayong ayohon, dili ra maabtan ug pipila ka minutos. Adunay usay molanat ug usa ka adlaw kapin. Matud pa atong higala nga sapatero, mag-agad kini sa klasi sa sapatos, sa mga materyales nga gigamit ug sa disinyo sa paghimo. Sa laing bahin, ang kita-on sa mga sapatero mag-agad sa mga suki ug sa mga magpahimo. Importanti kaayo ang agi, kalidad ug kapulido sa trabaho. Ang mga kustomer dako kaayo ug ikatabang sa mga sapatero.
Gikinahanglan ang maayong katali-an ngadto sa mga suki. Dili susama ang mga tawo nga mopalit ug sapatos, tsinilas ug uban pa. Lain-lain ang ilang kinaiya. Kon ang sapatero maayo lamang nga modala sa iyang mga suki, dugokon gayud ang iyang sapatosan. Kinahanglan nga mapahiyomon ang mga suki nga mobiya sa atong sapatosan. Dili kalikayan nga sapotan ang mga sapatero sa mga suki ug mamalitay. Adunay daghan usab nga magdali. Kon giunsa sila pag-abi-abi sa sapatero mag-agad niini ang kita ug kadaghanon sa mga suki sa iyang sapatosan. Ang kinaiya ug pagkatawo, pulido nga trabaho ug kalidad sa serbisyo maoy mga sikrito sa usa ka sapatero.
