ANG pagtoo maoy makaluwas. Kini ang pagsalig sa mga butang nga atong gilauman nga dili makita. Anaa kini sa atong kaugalingon. Dili sa tanang higayon nga lig-on ang pagtoo sa tawo ilabi na panahon sa kalisod. Apan niini nga kalisod nga gikinahanglan kaayo ang pagtoo. Mahimo kining sakayan nga maoy makaluwas kanato panahon sa mga unos sa kinabuhi. Kon dili lig-on ang atong pagtoo, dali ra kining molugak. Hinuon mahimo ra usab kini nga ipahiuli kon ato kining himoon. Ang bisan nipis nga pagtoo makapairog ug makapasibog sa dakong bungtod. Kon unsay atong gihangyo sa Ginoo, madawat kini tungod sa pagtoo.
Kon kita mangayo, ubanan kini sa hugot nga pagtoo nga walay bisan tinipsing nga pagduda. Ang madudahon mahisama sa usa ka balud sa kalawran. Walay baroganan. Hapakon lamang kini sa hangin, anoron ug walay kapa-ingnan. Ang kahimtang sa kalibotan karon gisungog sa mga pagsuway ug kalisod. Nunot sa pag-abot sa tuig 2023, atong sakyan ang pag-irog niini. Ang buylo ug tulin sa iyang paglihok makapahatag kanato ug higayon nga mouswag ug molambo. Ang mga grasya ug panalangin nga atong giampo mahimong moabot sibo sa atong pagpaabot. Adunay panahon sa matag butang. Dili kita pasagdan ug dili biyaan.
Ang kaladmon sa paglaum masukod sa pagtoo. Apan ang paglaum adunay kinutuban. Ang sukdanan sa kinutuban matapos human moabot ang katumanan. Ang tawo walay katagbawan. Human maangkon ang mga damgo ug pangandoy, mosibaw na usab ang uban pang mga kagustuhan. Ang tawo walay kalipay. Ang tawo nagpuyo sa mga suliran. Tungod kini kay ang kapakyasan sa iyang tinguha maoy hinungdan sa mga problema sa kinabuhi. Unsaon nga ang tawo mobaton man ug mga pangandoy. Kon aduna lang untay kataposan ang mga pangandoy, magmalipayon na gayud ang tawo. Apan ang pagkatawhanon pabilin gihapon nga kinaiya sa tawo.
Gaan kaayo nga mangandoy. Ang atong hunahuna maayo kaayong mohimo ug mga gambalay nga makaaghat ug kainit sa pagbati. Ang kainit sa pagbati makapa-igting sa kaikag ug kaibog. Ang tawhanong kaibog usa ka dakong tintasyon ug pagsuway. Unsa kalig-on ang tawo sa iyang baruganan, ingon usab niini kagabok ang sukna sa pagpaka-arong-ingnon. Ang mga hagit magtakuban nga mga pagdasig. Luyo niining tanan, mamahimo kining lingla ug lit-ag tumong sa laing mga damgo ug pangandoy. Angay magbantay ang tawo nga nagmalamposon kay ang kalamposan maoy sinugdanan sa kapakyasan
