USA ka kan-anan nga nahimutang sa usa ka komersyal nga lugar sa lungsod sa Loon ang nasunog tungod sa wala maatiman nga pagluto kaniadtong Biyernes sa tungang gabii.
Sumala sa Loon Fire Station nga walay naangol atol sa insidente apan ang sunog nagbilin ug danyos sa mga kabtangan nga gibanabana nga kapin sa P120,000.
Ang restawran nga nahimutang duol sa national highway sa Barangay Moto Norte ug gipanag-iya sa usa ka Hospicio Camelotes ginama sa light materials.
Matod sa kabomberohan nga ang kusinero sa maong kan-anan nga si Dante Maratas nakatulog samtang nagpahumok sa karne.
Gilamoy na sa kalayo ang dakong bahin sa restawran dihang nakamata si Maratas.
Matod sa kabomberohan nga wala na mapalong ang sunog gamit ang fire extinguisher hinungdan nga miikyas si Maratas ug gialarma ang mga sikbit nga residente nga mitawag na usab sa mga otoridad.
Ang Loon Fire Station nipakatap dayon og mga fire truck ug personnel nga nakontrolar ang sunog alas 12:58 ug nadeklarar ang fire out sa ala 1:20 sa kaadlawon.
Ang maong restaurant nahimutang taliwala sa pipila ka mga establisemento apan wala na makakuyanap ang kalayo tungod sa firewall. (RTB)
