DAGHANG mga paagi aron makalampos ug molambo. Adunay gitudlo ang mga hanas ug batid. Daghan usab kitang mabasa sa mga sinulat ug mga libro. Bisan sa atong kaugalingon, aduna usab kitay mga gihunahuna nga paagi aron moasenso. Luyo niining tanan, ang pagbudlay maoy makahatag ug katumanan. Ang pagbudlay maoy paningkamot, pagkugi ug pag-antos aron matuman ang mga damgo ug pangandoy. Mga lakang kini ug mga laraw nga maoy angay buhaton ug himoon. Ang mga laraw ug plano gikinahanglan nga pagasugdan. Hangtod nga dili kini himoon ug buhaton, magpabilin lang kini nga walay hinungdan.
Kitang tanan adunay mga pangindahay ug pangandoy sa kinabuhi. Adunay mga damgo nga gustong mahatagan ug katumanan. Kita adunay mga butang nga gustong mapanag-iya ug maangkon, mga bahandi nga atong magamit alang sa pamuyo nga harohay. Taas ang atong mga panglantaw para sa mga anak ug sa tibuok pamilya. Walay bayad ang magdamgo ug mangandoy. Libre ang tanan. Adunay mga damgo nga sayon kab-oton ug ang uban lisod kaayong mahatagan ug katumanan. Dako kining hagit sa atong kaugalingon kon unsay buhaton ug himoon. Matud pa sa atong mga katigulangan, maningkamot ug magbudlay aron mohayahay.
Ang katumanan sa mga damgo tam-is nga paaboton. Makahatag kini ug kalipay, makadasig ug makalingaw. Makamugna kini ug dugang pang mga hagit. Makalig-on kini sa atong pagsalig ug pagtoo sa kaugalingon. Maaghat kita sa pagtahud sa atong pagkatawo ug makapabaton sa disiplina. Mahimo kitang sumbanan sa uban nga naglantaw sa katumanan sa ilang mga damgo. Pananglitan kita sa kadaghanan nga nakasud-ong kanato. Gihimo kitang bayani ug idolo sa mga katawhan. Gipasigarbo kita sa mga kahigalaan ug mga kaparentihan. Ang dungog nga atong nakab-ot nakahatag ug kamabulokon sa kinabuhi sa uban.
Ang kalamposan dili sama sa sili nga mohalang dayon. Dili kini maangkon sa usa ka pamilok. Bisan pag ato kining giplano pag-ayo, wala pa gihapoy kasiguru-an ang katumanan niini. Ang kalamposan mahimong dili moabot dayon. “Bahala ug hinay basta kanunay”. “Kon magdali ka, paghinay.” Mga panultihon nga angay hatagan ug pagtagad ug gibug-aton. Ang uban moingon nga moabot lang kini nga dili damhon. Ang kalamposan gikaluhaan ug paglaum. Kon wala kitay paglaum, mawala usab ang kainit sa atong pakigbisog. Ayaw bati-a ang kalaay nga magpaabot sa imong kalamposan. Padayon sa imong pagbaklay.
