NAGPADAYON ang National Grid Corporation of the Philippines (NGCP) sa ilang trabaho aron makompleto na ang Cebu-Bohol Interconnection Project (CBIP) sa Nobyembre 2023 bisan pa sa mga isyu sa right-of-way.
Matod sa project manager sa CBIP nga si Ian Husain, gipasaka ang mga kaso sa expropriation batok niadtong nagdumili sa pagbaligya sa ilang mga kabtangan aron mahatagan og dalan ang mga pasilidad sa NGCP.
Ang expropriation usa ka buhat sa pagkuha sa usa ka pribado nga gipanag-iya nga kabtangan aron makabenepisyo sa kaayohan ang publiko pinaagi sa gahum sa gobyerno sa eminent domain.
Si Husain miingon nga ang right-of-way nga mga isyu sa Bohol ug Cebu nga habig maoy labing dakong hagit alang kanila sa pagkompleto sa CBIP.
Sa iyang bahin, si Gobernador Aris Aumentado niingon nga nagmugna siya og task force nga motabang sa NGCP sa legal nga mga butang ug uban pang mga isyu nga naglambigit sa pagtukod sa CBIP nga andam makatabang sa Bohol nga makabaton og lig-ong tinubdan sa kuryente.
Dugang pa niya nga nagpaabot na lang siya sa bisan unsang tawag alang sa tabang sa NGCP.
“Naghimo ko ug task force nga tabangan nimo sila sa tanang problema. So far, wala pa man sila mo duol namo so possible pasabot kaya pa nila,” ni Aumentado.
Matod ni Husain, ang CBIP magdugtong sa mga substation sa Argao, Cebu ug Maribojoc, Bohol kay kompleto na sa 55 porsiyento.
Ang 230-kilovolt nga linya nga adunay labing taas nga kapasidad nga 1,200 megawatts gilauman nga makatabang sa Bohol nga matubag ang nagkadako nga panginahanglanon sa kuryente.
Sa bag-ong linya sa transmission, ang Bohol dili na magsalig lang sa Leyte alang sa suplay sa kuryente.
Una nang gipahibalo nga ang CBIP mahimong kabahin sa Visayas 230-kV looping interconnection.
Ang NGCP kasamtangang nagtrabaho sa 230-kV nga linya nga nagdugtong sa Cebu ug Negros ug laing linya nga nagdugtong sa Negros ngadto sa Panay.
Nagplano usab kini sa pag-establisar og ikaduhang linya tali sa Leyte ug Bohol nga naggamit usab og 230-kV nga linya nga adunay mas daghang load capacity kay sa kasamtangang 138-kV nga linya tali sa duha ka probinsiya. (RTB)
