APROBADO na sa 3rd reading atol sa session sa Sangguniang Panlalawigan ang Bereavement Assistance Ordinance nga programa ni Gob. Erico Aristotle Aumentado.
Kahinumduman nga gituki sa Committee on Social Services nga gipangulohan ni BM “Nanay” Lucille Lagunay ang mga detalye sa maong ordinansa sa mga nangaging mga Committee meetings.
Ang Bereavement Assistance mao ang panghatag sa P5,000 nga hinabang ngadto sa nagbangutang pamilya sa usa ka nitaliwan nga Bol-anon.
Una nang gihimo kini nga P3,000 lakip na ang usa ka sakong bugas apan nakadesidir ang komitiba nga himoon gyud kini nga P5,000.
Gikinahanglan nga moduso sa ilang Letter of Intent ang mga aplikante ngadto sa Office of Local Governance Affairs inubanan sa Certificate sa Barangay Residency sa nitaliwan nga myembro sa pamilya ug photocopy sa Death Certificate. (Kahlil Lester O. Camba)
