MAY ordinansa na unta nga magpabarug sa laboratory nga magtuki sa matang sa yuta ug kon unsay tanom nga haum alang niini, ug laboratoryo alang sa pagtino sa kalidad sa tubig nga makuha sa mga tubod ug nagkadaiyang tinubdan sa tubig.
Apan, ambot og ngano nga wala man mahi-apil sa ordinansa ang pagpahimutang og tawo nga maoy magdumala sa nahisgutang gipahimutang nga laboratoryo?
Labaw na nga wala magpahimutang og pundo alang sa suholan sa mga tawo nga modumala niini.
Kini karon ang gilihok sa Sangguniang Panlalawigan Committee on Agriculture pinangulohan ni Bise Gob Dionisio Victor Balite kay dagway og ampaw ang nahaunang Provincial Ordinance No. 2021-029 nga giila nga Ordinansa nga Magtukod sa Soil and Water Laboratory Center sa lalawigan sa Bohol ug naglatid sa kantidad sa matag serbisyo nga itanyag niini.
Sa milabay nga session sa Sangguninag Panlalawigan, mismo sa Bokal Lucille Y. Lagunay ang mipalubad sa sugyot nga amendahon ang nahaunang ordinansa pinaagi sa iyang giduso nga Provincial Ordinance No. 017-2022.
Kahinumduman nga ang Provincial Ordinance No. 2021-029, napalabang na sa Sangguniang Panlalawigan ug giaprobahan na niadtong Nobembre 29, 2021, ug gani, anaa na sa 30% ang nahuman sa pasilidad nga anaa nahimutang sa Bohol Island State University (BISU) sa Bilar Campus.
Samtang wala pa matibawas ang pagkahuman sa pasilidad, buot ni Bokal Lagunay nga isukip na sa naaprobahang ordinansa ang pagkuha og mga propsesyonal nga empleyado nga maoy magdumala sa pagpadagan sa nahisgutang mga laboratory subay usab sa gilagda sa RA 10657 o ang Chemistry Profession Act.
Sa sugyot ni Lagunay, nanginahanglan ang nahisgutan nga laboratory sa Chemist I nga may Salary Grade 11, Chemist II nga may Salary Grade 15, Laboratory Technician II nga may Salary Grade 8 ug Laboratory Aide II nga may Salary Grade 4.
Ang pagkuha usab niining nahisgutan nga mga posisyon ug mga tawo, gikinahanglan aron ang Bohol makasugod na sa pagkuha og lisensya alang sa pagpadagan sa nahisgutang laboratoryo.
Gawas pa sa pagpahimutang og tawo nga haum ang ilang kapasidad sa gikinahanglan sa laboratoryo, ang bag-ong ordinansa naglatid usa sa paghimo og tinuig na nga pahat alang sa suholan sa mga nahisgutang mga tawo, lakip na ang pag-ugmad pa sa pasilidad, pundo alang sa pagmintinar niini.
Ang pagtukod sa nahisgutang laboratory, daku unya og ikatabang sa mga Bol-anong nanguma, aron makahimo na og soil analysis sa ilang mga umahan aron usab nila masayran kon unsa nga abono ang gamiton ug unsay tanom nga ma-ayo sa nahisgutang yuta.
Ang kawalay kasayuran kabahin sa kinaiya sa yuta nga gitamnan, maoy sagad nga hinungdan ngano nga mapalpak ang pagpananum.
Niini, matud ni Bise Gobernador Balite, ang gisugyot nga ordinansa angay lamang nga mapalusot na sa labing dali aron magamit na dayon sa mga Bol-anon nga nagtimbang sa kagamhanan sa paghatag og dugang suplay sa pagkaon, pinaagi sa pang-uma. (RAHC/PIA-7/Bohol)
