BISAN niining panahon sa kapaskuhan diin naandan na ang paghinatagay og regalo, pahinumdum sa Office of the Ombudsman Visayas ngadto sa mga opisyal ug kawani sa gobiyerno nga di modawat og gasa, kwarta o pabor gikan sa ilang mga kliyente.
Kini aron kalikayan usab ang mga alegasyon nga modawat sila og suhol o pabor alang niadtong mga dunay transaksiyon sa ilang opisina o ahensiya.
Matod ni Hon. Deputy Ombudsman for the Visayas Paul Elmer M. Clemente nga anaa sa balaod, partikular na sa Republic Act (RA) 6713 kon Code of Conduct and Ethical Standards for Public Officials and Employees, ang pagdili sa mga kawani ug opisyal sa gobiyerno pagdawat og gasa gikan sa ilang mga kliyente, Pasko man o ordinaryong adlaw.
Gipasabot ni Clemente nga obligasyon ug kabahin sa katungdanan nila nga anaa sa gobiyerno nga mohimo sa ilang trabaho kay duna man silay sweldo alang niini.
Dugang niya nga dakong kalapasan sa balaod ang pagdawat og suhol o pag-entertain sa mga under the table transaction ilabi na kon kini maghatag og pabor sa usa ka kliyente aron mas mapadali ang ilang mga tuyo sa opisina o mahimong paborable ang desisyon sa ilang mga kaso.
Dunay silot nga nagpaabot alang niadtong mga mapamatud-an nga nidawat og mga regalo o padangog gikan sa mga tawo nga dunay transaksiyon sa ilang opisina.
Matod ni Clemente nga lakip sa posibleng silot niini mao ang pagpabayad ug multa, suspensiyon o pagkataktak sa serbisyo. Kon guilty sa criminal nga aspeto, hayan, nga posible pa mapriso ang kawani nga mohimo niini. (RTB)
