NIPADAYAG sa pagkaalarma ang bag-ong gitudlo nga Bohol Provincial Police Office (BPPO) director Col. Lorenzo Batuan sa sunodsunod nga disgrasya sa kadalanan sa Bohol sa miaging mga semana hinungdan nga iyang gipatawag ang 48 ka mga hepe sa kapolisan sa lalawigan.
Si Batuan, atol sa iyang senemanang press briefing karong bag-o nimando sa mga police station commanders sa probinsiya sa paghimo og “proactive measures” aron ang traffic-related nga mga insidente nga misangpot sa pagkaangol, kadaot sa kabtangan, ug kamatayon.
Ang datus gikan sa BPPO nagpakita nga sulod sa usa ka semana gikan Nobyembre 14 hangtod Nobyembre 20, 2022 adunay 40 ka traffic-related nga insidente ang natala sa 20 ka lokalidad sa probinsiya.
Mga 24 sa mga insidente ang misangpot sa pagkaangol, 14 ang miresulta sa pagkadaot sa kabtangan, ug duha ang nakaingon sa kamatayon sa duha ka tawo.
Ang labing daghan nga natala nga insidente mao ang Tagbilaran City, nga adunay lima ka insidente, ug Panglao ug Lila nga adunay upat matag usa.
Matod ni Batuan nga 34 sa mga kaso ang nasulbad na samtang duha ang na-clear ug laing duha ang wala pa masulbad.
Gipasangil sa hepe sa pulisya ang pagtaas sa mga insidente nga may kalabotan sa trapiko sa pagtangtang sa mga protocols nga gipahamtang sa hapit duha ka tuig sugod sa pagsugod sa pandemya sa sayong bahin sa 2020.
Matod ni Batuan, makig-alayon sila sa Land Transportation Office aron ma-deputize pa ang mga polis aron masikop ang mga traffic violators nga ubos ra sa hurisdiksyon sa LTO.
Gitataw niya nga kung ma-deputize ang mga pulis karong tuiga, epektibo ra kini hangtod sa katapusan sa Disyembre. (RTB)
