USA ka kusog ang pagtan-aw sa kinabuhi o pagpakabuhi niining kalibutan isip halangdong gasa kaysa pulos pagtan-aw niini isip lisod nga pagsulay.
Tinuod nga anaay daghang hugna sa atong kinabuhi nga kita mawad-an og kusog ug paglaum tungod sa nasinating mga kapakyasan o kapildihan.
Ako, ikaw o kitang tanan, for sure, nakaagi og kasakit taliwala sa mga kalipay. Ug padayong makaagi niini hangtud ani-a pa niining kalibutana.
Daghan ko’g mga kapakyasan sa kinabuhi: sa pagtungha, sa pagkab-ot sa pangandoy, sa bugnong lugaynon, kompetisyon sa akademya nga aspeto, sa mga duwa sa kinabuhi, sa sugal ug uban pa.
Apan nianang tanan, kanunay gipakadak-an ang paglaum diha sa pagsidlak sa adlaw sa matag kabuntagon nga moabot.
Anaay mga higayon nga ana-a kita sa kasubo, pagbakho, danguyngoy apan ang mga walog sa maong negatibong luha, gisuyop ug nauga sa uhaw nga kayutaan nga niduyog sa maong mga kasakit.
Nakat-on ko nga mobarug gayud sa matag paghagba, kay dili sayon nga magkamang kanunay.
Napakyas ko sa akong mga saad kaniadto sama sa pagpadayon sa akong pag-eskuwela.
Ana-a gayuy mga panghitabo nga dili nato mapangandaman. Anaay mga panghitabo nga wala nato damha nga moabot.
Usahay lisod sa pagdawat niini apan angay atubangon nga puno sa kadasig nga kini malatasan.
Gani, daghang mga pagbiay-biay nga akong nadawat kaniadto ilabina sa akong pagdagan pagka-konsehal sa lungsod. Nidugang niini ang pagka-parot.
Apan sa tinuod lang, wala nako gi-konsiderar nga napildi ko, kay napildi ra ko sa salapi.
Kay ang tinuod nga intensyon nga makaalagad, dili magsalig sa binandol nga kuwarta.
Niagi na kadto apan anaay mga nakat-unan. Ug ang akong gipaabot mao ang tanyag sa umaabot.
Kay wala nako sirad-i ang mga maayong opportunidad nga manuktok.
Nagpabiling nagsiga ang paglaum sa umaabot ilabina ang kagustuhan nga makaalagad sa atong kaigsoonan.
Taas pa ang panahon. Daghan pa ang mga opportunidad. Ug kini nagpangaway kanato.
Busa, sa matag unos nga mohapak kanato, matandog man kita o dili, magpadayon gihapon sa mga maayong tumong sa kinabuhi.
Karon ilabina usa na ako ka amahan, kanunay nako gitakin sa akong kaugalingon ang positibong panglantaw ilabina ang pangandoy nga mahaw-as sa kalisod ang akong pamilya — nga makasemento og sihag nga kaugmaon.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
