GIPANGLANTAWAN nga mosaka ang supply sa ilegal nga drugas sa sunod karon buwan sa Disyembre ilabi na nga saulogon ang pasko ug bag-ong tuig.
Sumala pa sa Tagbilaran City police Office (TCPO) nga adunay posibilidad nga modaghan ang supply sa ilegal nga drugas sa sunod buwan diin gilaomang daghang kalingawan ug party ang ipahigayon tungod sa pagsaulog sa pasko ug bag-ong tuig.
Matud pa sa TCPO nga gihatagan na karon ug kamandoan ang City Intelligence Unit sa pag-monitor sa mga establisamento sa siyudad sama sa mga disco bar, restaurants, karaoke bars, ug uban pa nga mga entertainment nga lugar.
Ang kapolisan nagtinguha karon nga mopatawag og consultative meeting uban ang mga nagdumala og mga establisamento sa siyudad lakip na ang mga commercial center ug night entertainment establishment aron tukion ang mga lakang nga magpugong sa pagsulod sa mga ilegal nga drugas sa ilang mga balay patigayon.
Ang kapolisan sa Dakbayan sa Tagbilaran padayon sa ilang hugot nga kampaniya batok sa ilegal nga drugas. (RTB)
