KON KINSA PA ANG MGA SAD-AN sa balaod ug sa katawhan, mao pa hinuo’y hawud.
Mao kana ang reyalidad kon maghisgot kita og mga abusadong politiko nga nakaon na sa bati nga sistema ilabina sa korapsyon nga nahimo ng tradisyon.
Daghang mga dagko ug inilang politiko dinhi sa Bohol nga naigo niining istoryaha. Ug lagmit, nakabasa usab niini karon.
Wala may problema kon mo-react kamo. Apan ang problema kon tinuod ang gisulti unya kamo mokisi-kisi. Masuko.
Sa ato ng nahisgutan dinhi niining akong lindog, “If you can’t stand the heat, get out of the kitchen!”
Kon dili makaya ang presyor sa politika ilabina ang mga kritisismo gikan sa katawhan ug sa mga karibal sa maong trabaho, ayaw na lang paluma-luma og sulod. Ayaw sudla.
Ang nakaparat kay dili na mohawa sa politika ang ubang mga politiko ilabina kadtong nangaraan na. Ngano? Kay gihimo na nilang negosyo o panginabuhian ang pagserbisyo sa katawhan.
Laway ug mga saad ang puhunan ug ang binandol nga salapi panahon sa pagpapili, nga dili gayud unta sakto, apan mao na’y gitawag og “tradisyon” — ang pagpalit sa boto sa katawhan.
Kasagaran kon kuwarta ang gisaligan aron modaug, ang katawhan maoy makaluluoy.
Sige kita og pahinumdom niini sa katawhan apan daghan ang wala naminaw ilabina panahon sa Eleksyon.
Daghan gihapon ang nailad sa mga saad ug nahaylo sa dagkong kuwarta.
Gusto kita og kausaban apan ang uban sa atong kaigsoonan maoy nibalibad niini.
Apan dili gihapon kita kapuyon ilabina kay naghandom kita og malungtarong kausaban sa atong katilingban.
Ang atong gusto mahitabo nga unta makamata na ang uban sa atong mga kaigsoonan, dili man karon, basin ugma o sa sunod Piniliay.
Dili kita magpahurat sa mga ana-a sa gahum ilabina ang mga gipili. Kita ang angay maghinawod kay kita ang ilang mga agalon.
Dili kita angay mahadlok kay kita maoy nipiyal sa gahum nga ilang gigunitan. Kita maoy naghatag nila og lingkuranan.
Hangtud mahimo nato nga mopahinumdom sa uban, ato kanang buhaton bisan pa anaay madasmagan subay sa ilang hiwi ug dautang mga binuhatan.
Ako lang pud ipahinumdom ang giingon ni Narda/Darna (Jane de Leon) nga usa ka Bol-anon:
“Ang pinakamalaking kasalanan ay kapag may kakayahan kang tumulong, pero wala ka namang ginawa.”
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
