SUBLING nabanhaw ang panawagan alang sa dugang duha ka mga distrito sa Bohol nga maghimo na niini nga lima ka legislative districts.
Nasayran ning pamantalaan atol sa regular nga sesyon sa Sangguniang Panlalawigan (SP) kaniadtong Nobyembre 8, 2022 nga gipangunahan ni bise-gobernador Dionisio Victor Balite, kini nisagop sa resolusyon sa Philippine Councilors’ League (PCL) nga nagsugyot pag-usab sa dugay nang gihuna-huna nga pag-usab sa distrito sa probinsiya.
Si PCL president Gloria Gementiza kinsa naglingkod isip ex-officio member sa SP mipresentar sa resolusyon nga nag-awhag sa tulo ka mga miyembro sa House of Representatives sa probinsiya nga sila Rep. Edgar Chatto, Rep. Vanessa Aumentado, ug Rep. Alexie Tutor sa paghimo ug pagpasar og balaodnon nga maghatag ug dalan alang sa re-apportionment.
Miingon si Gementiza nga ang dugang nga mga distrito makatabang sa pagdasig sa pagtubo sa ekonomiya ug paghimo og mas lig-on nga representasyon sa Kongreso.
Gipasabot niini nga adunay panginahanglan alang sa seryoso nga pagtuon alang sa pagbag-o sa distrito aron mapalambo ang representante nga demokrasya ug ekonomikanhon ug sosyal nga pag-uswag alang sa probinsya nga adunay populasyon nga kapin sa 1,300,000.
Sa iyang resolusyon, gisugyot sa PCL ang matag legislative district sa Bohol nga langkuban sa mosunod:
First District – Panglao, Dauis, Baclayon, Alburquerque, Sikatuna, Cortes, Maribojoc, ug Tagbilaran City.
Second District – Balilihan, Antequera, Loon, San Isidro, Tubigon, Clarin, Inabanga, ug lungsod sa Buenavista.
Third District – Getafe, Talibon, Bien Unido, Trinidad, San Miguel, Ubay, ug Pres. Carlos P. Garcia.
Fourth District – Jagna, Duero, Guindulman, Anda, Candijay, Alicia, Mabini, Pilar, Sierra Bullones, ug Dagohoy.
Ug katapusan, Fifth District – Loay, Lila, Dimiao, Valencia, Garcia-Hernandez, Loboc, Sevilla, Bilar, Batuan, Carmen, Catigbian, Sagbayan, ug Danao.
Matod ni Gementiza, ang Bohol nakab-ot na sa konstitusyonal nga kinahanglanon sa populasyon alang sa pagtukod og lima ka distrito nga adunay mga lumulupyo nga kapin sa 1.3 ka milyon.
Iyang gikutlo ang Seksyon sa Artikulo VI sa 1987 Constitution nga nag-require sa usa ka siyudad nga adunay populasyon nga labing menos 250,000 aron kini adunay labing menos usa ka legislative district.
Samtang ang 250,000 nga kinahanglanon may kalabotan sa mga syudad, ang probisyon usab nag-ingon nga ang matag probinsya kinahanglan adunay labing menos usa ka representante.
Ang sama nga seksyon nag-ingon usab nga ang “mga distritong lehislatibo gibahinbahin sa mga probinsya, syudad, ug lugar sa Metropolitan Manila subay sa gidaghanon sa ilang tagsa-tagsa ka mga lumulupyo, ug base sa uniporme ug progresibong ratio.”
Niadtong 2018, ang kanhi representante sa ikaduhang distrito ug karon Gobernador Aris Aumentado misugyot ngadto sa ika-17 nga Kongreso sa pagbahin-bahin pag-usab sa lalawigan ngadto sa lima ka distrito.
Apan, ang House Bill 7999 ni Aumentado wala makaabot sa sala alang sa deliberasyon tungod kay napakyas kini nga makapasar sa Committee on Local Government.
Sa susama, ang usa ka balaudnon nga gisang-at ni kanhi Rep. Eladio Jala ubos sa ika-14 nga Kongreso niadtong 2004 nagpabilin lamang sa samang panel ug wala gisumiter sa unang pagbasa. (RTB)
