SUPORTADO sa ikaduhang labing-labaw nga opisyal sa Bohol ang usa ka balaodnon sa Kamara-Baha karton nga pasakaan ang sweldo sa public school teachers gikan sa P25 439.00 o salary grade (SG-11) ngadto sa P41,508.00 o SG 17.
Kini ang gibutyag ning pamantalaan ni Bise-gobernador Dionisio Victor A. Balite, Ph.D diin ubos kini karon sa House Bill (HB) 4608 nga naila isip “Public School Teachers Salary Increase Act”.
Gipasabot ni Balite nga hugot ang iyang suporta niini tungod kay gawas sa maong pagpa-usbaw sa sweldo tumong sab sa maong HB ang tinuig nga P8,000 nga teaching supplies allowance ug P10,000 nga medical examination ug treatment allowance alang sa mga magtutudlo.
Gipasabot sa bise-gopbernador nga angayan lang gyud pasakaan ang suhulan sa mga magtutudlo tungod sa pagsaka sa “cost of living o sa commodity prices”.
Dugang ni Balite nga ubos sa Akta Republika 11466 kun “Salary Standardization Law of 2019” ang entry- level sa public school teachers nikabat sa P25 mil matag buwan.
Suma ni Balite nga ang HB 4608 mag- cover sa teaching personnel sa tanang public schools sa elementarya u secondary levels nga giila usab sa Republic Act No. 4670 kun “Magna Carta for Public School Teachers”.
Nasayran niini nga adunay 15 ka mga balaodnon ang naduso sa 19th Congress nga nagtinguha sa pagpa-usbaw sa sweldo sa public school teachers ug nag-ong-ong kini sa Committee on Appropriations. (RTB)
