NAG-UNA sa First 100 Days Accomplishment Report ni San Miguel Mayor Ian Gil G. Mendez ang iyang giluwatan nga Executive Order No.25 – “San Miguel First Policy”.
Mao kini ang giingong yawe sa kasolbaran sa unemployment, pagbuhi balik sa ekonomiya ug dugang kalamboan sa lungsod.
Si Mayor Mendez naa sa iyang unang termino isip mayor sa San Miguel.
Dugang pa niini, mas gibutangan sa gibug-aton ang programa sa panglawas ug panginabuhian ilabi na sa panahon sa pandemya.
Sugod sa iyang pagpangutungdanan isip mayor, 223 ka mga Job Orders ug 57 ka Contract of Services ang gipang-renew.
24 ka mga estudyante ug apil gani ang mga “out of school” youth ang na-hired nga dunay daily rate nga P410.27.
8 ka San Miguelnon ang “hired-on-spot” sa PryceGas Inc. Nakig-alayon usab ang mayor sa mga dagkong resort sa Panglao sama sa Hennan, South Palms ug Bellevue alang sa mga umaabot pang mga pagpanarbaho.
Nagpadayon ang “Zero Balance Billing” sa tanang Indigent Patients nga ma-admit sa San Miguel Hospital lakip na ang “Libreng Sakay” sa mga Dialysis Patients gikan sa San Miguel paingon Talibon o gikan sa ilang lungsod paingon sa Dakbayan.
Isip usa ka registered nurse, wala usab kalimti sa mayor ang pagpang-apod sa libreng maintenance medicines alang sa Diabetes ug High Blood Pressure.
Dunay (1) usa ka bag-ong ambulance ang LGU-San Miguel gikan sa kaulohan.
Walay hunong usab ang PinaLakas Vaccination Program samtang 3rd placer ang San Miguel isip Most Outstanding Nutrition Council sa Bohol.
Sa laing bahin, ang Sangguniang Bayan nga gipangulohan ni Bise Mayor Faustino “Lito” Bulaga nakapa-aprobar sa 48 ka Appropriation Ordinance, 97 ka Resolutions ug 145 ka mga Committee Reports.
Ang “San Miguel First Policy” gipaabot nga mas mopasaka pa sa Business Tax collection sa lungsod samtang naglaraw ang mayor nga dunay counterparting alang sa mga Livelihood Groups. (Kahlil Lester O. Camba)
