PARTE sa atong pagka-demokratikong nasud nga ang mga lider ilabina ang mga opisyales sa gobyerno, angayan nga andam modawat og mga kritisismo.
Ikaw, kamao ka ba modawat og mga kritisismo: healthy o negative critisisms?
Sayon alang sa katawhan nga moingon, “Paluma-luma og sulod sa politika kipi man diay kaayo.”
Hinuon, anaay pipila nga madutlan niini ug mausob ang ilang pagka-kipi ilabina kon tambagan sa ilang mga responsableng political advisers.
Pero ang pait kon dili gayud kamao modawat og mga pagsaway. Dili kamao modala sa mga pagsaway.
Kon ikaw nagplano kang mosulod sa politika, timbang-timbanga daan kon kaya ba nimo ang grabeng “pressure” sa imong gisudlan — ang politika ug ang gubot nga sistema sa pang-gobyerno.
Daghang maayong laki niining maong nataran sa panerbisyo apan pipila lamang nga kamao mopa-uyon-uyon sa dili mopabor nga mga mata ug sentimiyento sa katawhan.
Ang lider o politiko nga dili kamao modawat og mga kritisismo, dili angay hatagan og laing termino sa pagpanerbisyo. Dili angay hatagan og luna sa opisina de gobyerno.
Mas samot nga ayaw na palingkura ang daghan na og rekord sa korapsyon o pagpangawat sa ‘kaban ng bayan’.
Wa pa ba diay ka makaamgo?
Ang kurakot nga opisyales sa gobyerno suma pa sa usa ka manunulat, mas ngilngig pa kaysa mga kriminal. Ngano?
Ang nabiktima sa mga kriminal pipila lamang, samtang ang mga kawatan sa gobyerno nabiktima ang lungsod ug ang lalawigan o ang tibuok nasud.
Daghang naamong o maamong pa kon magpadayon ang ilang mga bating binuhatan.
Ug labaw niana, ang gibalik-balik nato og pahinumdom sa ubang mga politiko — ayaw gamita ang balaod aron patak-umon ninyo ang mga tigsaway nga mao ang inyong gialagaran ug mao usab ang naghatag kaninyo og honorarium o suweldo.
Ayaw pagtinalawan. Ayaw pagkinipi ilabina sa ordinaryong katawhan nga huyang sa balaod ug hustisya.
Sa mga ana-a nagserbisyo sa gobyerno, kini ang mensahe gikan sa katawhan:
“If you can’t stand the heat, get out of the kitchen!”
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
