TUNGOD sa hangyo ni kanhi Bise Gubernador, Manlalaban Dionisio Dajalos Balite, nga tuki-on ang kasaysayan sa atong Junta Provincial sa Bohol atong hikaplagan ang pipila ka mahinungdanong impormasyon.
Pinaagi sa panabang sa atong maabtikong mga tinugyanan sa atong Provincial Library pinangulohan ni Provincial Librarian Vida Cloma-Aparicio atong nasayran nga ang atong kasamtangang Sangguniang Panlalawigan mao ang ika-29 nga Junta Provincial. Wala nato kini tawgang Ika-29 nga Sangguniang Panlalawigan (SP) tungod kay ang SP nagsugod lang sa 1991 ubos sa Local Government Code, samtang ang atong Junta Provincial nagsugod pa niadtong panahon sa mga Amerikano.
Ang unang mga Myembro sa Junta Provincial segun sa atong gihuptang mga dokumento mao sila si Tiburcio Bongcaras ug Sofronio T. Camacho. Ang ilang Kalihim mao si Ramon Enerio. Tuig kini sa 1925 ngadto 1928. Ang Gubernador niadtong mga tuiga mao si Filomeno O. Caseñas. Walay nahipatik nga Bise Gubernador niadtong tungora.
Buot natong ipaklaro nga kita nagbase lamang sa unsay mga dokumento ng atong gihuptan. Mahimong nasayup kita. Busa kon aduna kamoy mas husto o dugang nga impormasyon, ayaw kamo pagpanuko pag-kontak niining manunulat. Andam kitang mousob sa atong mga datus kon adunay mas tino ug tataw nga impormasyon.
Niadtong tuig 1978, kap-atan og walo (48) ang myembro sa atong Junta Provincial. Sila mga tinudlo ni kanhi Presidente Ferdinand Edralin Marcos ug nagrepresentar sa tanang lungsod ug bugtong syudad ning atong lalawigan.
Sa pagkakaron, adunay kapin sa 70 ka mga buhing myembro sa atong Junta Provincial lakip ang mga retirado na. Ang katapusang mitaliwan mao si Dr. Elpidio Manliguez Jala nga lumad sa lungsod sa Loboc.
Iyang gisundan sa pagtaliwan si Manlalaban David Belarmino Tirol kinsa naghupot sa record isip kanhi Tagbilaran City Councilor, Povincial Board Member, Representante sa Batasang Pambansa, Vice Governor, ug Governor ning atong lalawigan sa wa pa siya mobiya sa iyang pisikal nga saput niadtong Marso niining tuiga.
Si Dr. Dionisio Victor Ancog Balite, nga karon mao ang kasamtangang ika-26 nga Bise Gubernador sa kasaysayan sa Bohol, nahimo usab nga myembro sa atong Junta Provincial sa duha ka termino una siya napili pagka-Bise Gubernador sa miaging Mayo.
Ang iyang amahan, si Manlalaban Dionisio Dajalos Balite, nga nahimong Provincial Board Member sa makadaghan ug Bise Gubernador niadtong tuig 2016 ngadto sa 2019, buot magtukod sa usa ka organisasyon sa mga kanhi myembro sa atong Junta Provincial.
