DILI tanang higayon nga ang tawo molampos sa iyang mga laraw ug plano sa kinabuhi. Bisan sa mga paningkamot nga mahatagan ug katumanan ang mga damgo ug pangindahay, aduna gayoy mga kapakyasan. Ang kinabuhi puno sa mga problema ug pagsuway. Bisan tuod nga ang tawo gilalang sibo sa dagway sa Magbubuhat ug adunay kinabuhi, nahiagom pa gihapon kita sa silot sa pagpakasala. Hinuon, ang tawo gihatagan ug galamhan ug gawasnon pa gihapon nga mobuhat subay sa mando sa iyang konsyensya. Ang iyang himoong sukdanan mao ang pagkamaayo ug pagkadautan. Maoy hinungdan nga dili gayud angay nga mawad-an ug paglaum sa kinabuhi.
Ang tawo, sa iyang pagpuyo dinhi sa kalibotan, gihatagan sa tanang gikinahanglan sa kinabuhi ug pagpakabuhi. Walay bayad ang tubig, hangin, silaw sa adlaw, init ug ulan. Bisan pa nga namugna ang adlaw ug gabii, adunay bulan nga maoy mobanwag panahon sa kagabhi-on. Gihatagan ug tabunok nga yuta, puno sa mga kalasangan ug lunhaw nga mga kasagbotan. Ang kahanginan gibutangan ug kalanggaman bisan gani bisan panahon sa kangitngit. Adunay kadagatan ug kalawran nga buhong sa mga isda ug kinabuhing dagat. Ang kinaiyahan gihimo aron makahatag sa tawo ug kahamugaway sa iyang pagpuyo.
Ang tawo gihimong piniyalan sa mga gasa ug panalangin gikan sa kahitas-an. Gisalig ngadto kaniya ang halos tanang butang gawas niadtong gidili. Gihimo nga kasugoan ug gidid-an nga mokaon sa bunga kahoy sa kinabuhi. Gisupak kini sa tawo nga misangpot sa pagpakasala. Ang kasal-anan nahimong tunglo sa mga kaliwat ni Adan ug ni Eba. Naputol ang maayong katali-an sa binuhat ug magbubuhat. Nawala ang kahigayonan sa kinabuhi nga walay kataposan tungod sa silot sa kamatayon nga maoy bunga sa pagpakasala. Apan tungod kay gihigugma sa Dyos ang kalibotan, gihatagan ang tawo sa kahigayonan nga maluwas gikan sa kamatayon nga walay kataposan.
Apan ang tawo nalimot nga siya usa lamang ka piniyalan. Ang mga gasa ug panalangin sa kalibotan nga gisalig ngadto kaniya, iyang giabusahan. Wala kini niya mahala ug amomaha. Ang mga butang nga maghatag kaniya sa kasayon, kalipay ug kahamugaway gipasagdan ug giusik-usikan. Iya kining gibali-wala ug gitamhangan. Mahimong nahimo kining kabalin sa tunglo sa pagpakasala. Bisan ug unsa-on sa pagpaningkamot, anaa gihapon ang kapakyasan. Si Adan kinahanglan nga magpatulo ug singot aron makakaon ug mabuhi. Nagpasabot lamang kini ug pakigbisog ug paningkamot. Apan tungod sa gugma sa Dyos sa katawhan sa kalibotan, dili gayud Niya kini pasagdan.
