GIDASIG sa kanhi administrador sa Cooperative Development Authority (CDA) Benjie Oliva, ang mga kooperatiba sa pagmugna og mga tinubdan sa kuryente aron kini mobarato.
Ang pamahayag ni Oliva giluwatan ning pamantalaan atubangan sa tiyabaw sa mga konsumidor sa kamahal sa kuryente sa Bohol karon.
Niingon si Oliva nga kon dunay mga koop nga nagpadagan sa linya sa kuryente ug nag-apod-apod sa kuryente, mas maayo nga sila momugna sa mga tinubdan o source sa kuryente.
“Mga kwartahan ang koop sa Bohol, busa capable ni sila”, pasabot ni Oliva.
Uyon usab si Oliva nga imbestigahon sa Sangguniang Panlalawigan (SP) ang BOHECO-1 gumikan sa kamahal sa ilang kuryente sa tag P17.21 ang matag kilowatt hour nga gipamaligya ngadto sa mga miyembro-konsumenti niini.
“Angay pod i-review kon dili ba sobra ra ang mga sweldo ug benepisyo sa mga miyembro sa board of directors sa maong kooperatiba kay non-stock, non-profit coop baya unta sila”, sigon ni Oliva.
Willing sab si Oliva nga motabang kon unsay gikinahanglan aron lang mobarato ang kuryente ug dili kaayo mabug-atan ang mga Bol-anon. (RTB)
