ANG Boholana nga si Dalereich Polot kinsa gitawag nga “chocolate princess” sa Bohol, napili nga makadawat sa Fortune-Goldman Sachs Global Women Award, nga naghimo kaniya nga labing una nga Pinay nga gihatagan sa prestihiyosong award sa 15 ka tuig sukad kini natukod.
Si Polot, kinsa usa sa duha lang ka award recipients, hatagan og pasidungog isip kabahin sa Fortune Most Powerful Women Summit nga gipahigayon sa Ritz Carlton Hotel sa Laguna Niguel, California sugod ugma Oktubre 10 hangtod 12.
Ang 34-anyos nga taga Tagbilaran City milupad paingon sa US karong semanaha aron personal nga makadawat sa award atubangan sa mga babaye nga giisip nga labing gamhanan sa kalibotan sa Fortune.
Ang presidente sa Goldman Sachs Foundation nga si Asahi Pompey motugyan sa pasidungog ngadto nila Polot ug Hend Osama sa Egypt atol sa ika-15 nga tinuig nga Goldman Sachs-Fortune Global Woman Leaders’ Summit.
Lakip sa mga nakumpirma nga moapil sa kalihokan mao sila si Melinda Gates, Representante sa US nga si Liz Cheney, Representante sa US nga si Katie Porter, ug ang Unang Kasosyo sa California nga si Jennifer Siebel Newsom, ug uban pa.
Motambong usab sa maong kalihokan mao ang mga top female executives sa Amazon, AT&T, Best Buy, Cisco, Citi, Coca-Cola, Deloitte, Disney, Estee Lauder, Google, Goldman Sachs, IBM, Johnson & Johnson, Levi Strauss, Mastercard, Merck, Microsoft, Nike, Nordstrom, PayPal, Peloton, PepsiCo, Pfizer, Procter & Gamble, Salesforce, Target, Twitter, UPS, Walmart, Workday, Verizon, ug Visa.
Si Polot hatagan ug award alang sa iyang gisugyot nga proyekto nga “Livelihood Recovery through Cacao Rehabilitation and Production for Women Farmers.”
Ang inisyatiba gituyo aron matabangan ang mga mag-uuma sa cacao kansang panginabuhi naapektuhan sa Bagyong Odette nga mihapak sa Bohol niadtong Disyembre sa miaging tuig. Ang iyang sugyot gipili gikan sa gatusan ka uban nga gisumite gikan sa tibuok kalibutan.
Kaniadtong 2019, nakadaog si Polot gikan sa Asia-Pacific Economic Cooperation (APEC) sa Business Efficiency and Success Target (BEST) award alang sa “Best Family Support” atol sa Women and the Economy Forum sa 21-member bloc sa La Serena, Chile.
Ang iyang 100-percent unsweetened chocolate” pinaagi sa Dalareich Food Products (DFP) nga nakabase sa Tagbilaran nakadaog og Gold Award sa prestihiyosong internasyonal nga London-based Academy of Chocolate Awards sa samang tuig. (RTB)
