GIBUTYAG ni Corella Mayor Dee Tocmo nga ang iyang lungsod ang dunay kinaubsang poverty incidence sa tanang lungsod dinhi sa Bohol ug Top 7 sa Region 7.
Base kini sa datus sa PSA dugang pa sa mayor kinsa nakahinabi sa media sa wala pa siya nag-preside sa MDC/MADAC/MPOC joint meeting sa Session hall sa lungsod.
Nag-kampeon usab sila sa Community Driven Development Program sa DSWD, Awardee sa 2020 Revenue Generation Program sa Dept. of Finance ug 2019 Revenue Generation Program .
Naa sa mga P 91, 457,000 ang kantidad sa mga proyekto nga nabubo sa Corella ubos sa pagdumala ni Mayor Tocmo ug Bise Mayor Marizon Daquio.
Sa 2022, si Kagawad Atty. Neil Ochoco maoy nilansar pagka bise mayor samtang mobalik pagka konsehal si Daquio.
Sa termino ni Tocmo, gigahinan ang Brgy. Canapnapan ug Brgy. Pandol covered court og tag P5,000,000 samtang puros tag P3,000,000 ang Anislag covered court ug Anislag Brgy Hall.
Padayon usab ang Renovation sa Balay Lungsod nga nagkantidad P7,624,000 kon diin ang taliwala nga bahin mao na ang gisugdan sa pagtrabaho.
Dunay tag P2,000,000 ang pagpanindot sa Sambog ug Cancatac covered court samtang tag P1,000,000 sa Canangcaan covered court ug pagpa-ayo sa ilang Pumping station.
Wala maulahi ang Corella sa mga ayudang pinansyal alang sa mga PWD ug Displaced Workers nga naapektuhan sa pandemya. Gipundohan kini sa P1,833,000 samtang ang Covid-19 response sa lungsod gigahinan sa P3,000,000. (Kahlil Lester O. Camba)
