SUGDAN na sa Department of Agriculture (DA) sa unang semana sa Oktubre ang pag-apod-apod sa P5,000 ngadto sa 70,000 ka gagmay nga mga mag-uuma sa Bohol isip kabahin sa nationwide cash assistance program niini.
Sumala sa Bol-anong assistant secretary sa DA-Visayas Atty. Salvador Diputado nga mokabat sa P350 milyones ang andam na nga i-release aron pondohan ang proyekto apan wala pa makompleto sa ahensiya ang listahan sa mga makadawat.
Gipaniguro ni Diputado nga ana naa ang pundo ug ang listahan nalang ang dili kompleto ug ang mga lunsgod nga kompleto na ang mahatagan sa una aron dili na sila magbalik-balik.
Matod niya nga i-finalize pa sa DA ang listahan sa mga makadawat sugod ugma Lunes, Septyembre 26 sa tibook Bohol.
Gipasabot ni Diputado nga ang ang cash assistance gilusad pinaagi sa Republic Act (R.A.) No. 11598 nga gilagdaan isip balaod ni kanhi presidente Rodrigo Duterte niadtong Disyembre 2021.
Sigon niini nga gitugotan sa balaod ang DA nga makakuha og pundo gikan sa sobra sa P10 bilyones sa Rice Competitiveness Enhancement Fund (RCEF) aron direktang mahatagan og cash assistance ang gagmay nga mga mag-uuma hangtod sa sa tuig 2024.
Dugang sa opisyal nga ubos sa programa, ang gagmay nga mga mag-uuma nga nagtikad ug duha ka ektarya ug ubos nga yuta sa humay makadawat ug tinuig nga direktang tabang sa salapi diin ang pundo alang sa programa gipagawas niadtong sayong bahin sa Septiyembre.
Gisugdan unta sa ahensya ang pag-apod-apod sa miaging semana apan nakahukom nga i-postpone tungod sa dili kompleto nga listahan sa mga nakadawat.
Kaniadto, mga 50,000 ka mag-uuma sa probinsiya ang nakadawat sa cash assistance sa unang hugna sa distribution gikan sa Enero hangtod Mayo, ning tuiga. (RTB)
