GIPASALAMATAN sa labing una nga babayeng kongresista sa Segundo distrito ang Philippine Nurses Association (PNA) sa paghatag kaniya sa SHINE award.
Sumala pa ni CongW. Vanessa Vanvan Aumentado nga labing tinood ug mapaubsanon siyang nagpasalamat sa PNA tungod sa pag-ila nga gihatag kaniya sa kapunungan nga nahiapil siya.
Nasayran nga mihatag usab ang Kongresista sa acceptance message sa ngalan sa 17-ka mga awardees gikan sa lain-laing probinsya sa Rehiyon 7.
Sigon ni CongW. Vanvan nga ang Stories of Hope 7 Inspiration of Nurses’ Endeavor (SHINE) Awards gidungan atol sa 2nd Philippine Nurses Association (PNA) Region VII Innovation & Scientific Engagement nga gihimo Water Front Hotel sa dakbayan sa Sugbu kaniadtong Septyembre 23, 2022 ug nagdala sa tema nga “Filipino Nurse: Transformed to Lead, Committed to Care in Advanced Global Health.”
Sumala pa niini nga temporaryo niyang gipugngan ang iyang bokasyon sa pagka-nurse tungod sa kaminyoon, pagkainahan ug sa usa ka tawag alang sa serbisyo publiko isip bag-ong magbabalaod, apan ang trabaho ug ang kinaiya sa pag-amuma, pag-atiman ug pagpaambit sa isig ka tawo anaa kanunay.
Gipasabot ni CongW. Vanvan nga makahuloganon kaayo alang kaniya nga ang trabaho nga iyang gihimug-atan nakabaton sa pagsuporta sa katawhan.
“Kini nga award wala ako nag-inusara tungod kay kini usa ka hiniusang paningkamot ug usa ka resulta sa dedikado nga pagtinabangay isip usa ka team,” sigon sa babayeng kongresista ug unang ginang sa lalawigan sa Bohol. (RTB)
