“BOHOL nga usa ka smart ug resilient nga lalawigan nga nagpa-asdang sa inutok nga pagpanguma ug pag-ugmad nga malungtaron, kini ang labing mubo apan pintok nga saysay sa resulta sa strategic planning sa mga opisyales sa Bohol nga miagi sa Executive ug Legislative Agenda alang sa dugang kaugmaran.
Kini maoy gipaambit ni Atty John Titus Vistal, Provincial Planning and Development Officer, human mahitabo ang ELA sa Kapitolyo, niadtong miaging buwan.
Niadtong miaging buwan, nagkatigum sila ni Gobernador Aristotle Aumentado ug ang sangguniang Panlalawigan ubos ni Bise Gobernador Dionisio Victor Balite aron markahan ang ruta nga agi-an sa Bohol sa iyang lawig hangtud sa sunod nga katuigan.
Ug subay sa ilang nakasabutan, una niini ang pagseguro nga ang kalikopan nga kuhaan sa Bohol sa iyang gamitonon sa kaugmaran, kuhaon kini nga walay usik, ug aron may igo pa nga ikabilin alang sa umaabut nga henerasyon.
Niini, gikan sa kinaraan nga panguma, iliwag kini ngadto sa inutok nga panguma nga magpangandam na sa epekto sa nagsalimuang nga panahon, sama sa pagsibog sa mga tingtanum, pagpili sa mga binhi nga mulahutay sa huwaw ug lunop, segun sa panahon, ug pagtalikod sa mga bansay nga maka-umaw sa yuta.
Alang sa eco-cultural tourism, iliwag na usab kinig hinay, gikan sa turismo nga gidasmagan sa labing daghang tawo, pillion na sa Bohol ang pili nga turista nga dili maoy magdiktar sa matang sa turismo, nga mao usab ang hinungdan sa nagkalaka nga moralidad.
Sa pagpa-aghat sa mga gagmayng mamumuhunan, paningkamotan ang enabling environment alang sa pag-ugmad sa local nga patigayon alang sa mas lig-on nga negosyo nga makasagubang sa pagsuway ug askil nga makig-ambas palit sa sa kalibutan.
Palig-onon usab ang mga katakus sa mga trabahante ug mamumuo aron makabaton silag katakus nga mohaum sa unsay gikinahanglan sa panahon.
Sa pangagamhanan, sagopon sa Bohol ang dalan ngadto sa stratehikanhong pangagamhanan, pinaagi sa mga reporma ug pagpahamis sa burokrasya alang sa mas dali ug mas epsiyente nga kagamhanan.
Sa imprastraktura, mas pillion na sa local nga kagamhanan ang pagtukod sa mga obras nga makasugakod sa nagkagrabe nga hagit sa katalagman ug sa pag-ugmad sa mga panuga ug panubig nga maglantaw usab sa panginaghanglan sa umaabut nga katuigan.
Sa natad sa serbisyo panglawas, trabahoon ug ugmaron ang mas nagamhan ug mas nasayud nga komunidad nga nag-amping sa kaugalingon, ug paglikay sa sakit aron kubsan ang ma-ospital.
Ug agi og pagpangandam sa mas teknolohikanhong sikaranan sa Bohol nga maka-layat ngadto sa mas mabulokong ugma, matud sa Kapitolyo nga hiusahon na niini ang nga sistema sa mga kasayuran ngadto sa us aka sistema nga digital alang sa mas paspas, mas lukop ug walay laktaw nga serbisyo, pasabut ni Atty Vistal. (rahc/PIA-7/Bohol)
