DILI miembro kining inyong higala sa Rotary Club, ug walay plano nga magpamiembro. Apan wala kana magpasabut nga dili nato daygon ang nindot kaayo nga mga universal principles sa maong kapunongan. Mao kini Ang Upat Ka Sukdanan kon The Four-Way Test nga mahimong gamiton ni bisan kinsa sa bisan unsang aspeto sa iyang kinabuhi:
1. Is it the TRUTH? Mao ba kana ang KAMATUORAN?
2. Is it FAIR to All Concerned? MAKIANGAYON ba kini sa tanang nahilambigit nini?
3. Will it Build GOODWILL and Better Friendships? Makapatunhay ba kini sa MAAYONG RELASYON ug PANAGHIGALAAY?
4. Will it Be BENEFICIAL to All Concerned? MAKAAYO ba kini sa tanang nahilambigit niini?
Ang daghang mga sugilanon ug sinuwat mahitungod sa Four-Way Test makit-an sa Internet pinaagi sa http://www.thefourwaytest.com/.
Pwersa Retirado. Daghan kaayong mga retired persons dinhi sa ato; mga maestra, police, empleyado sa gobyerno, ug uban pa. Nahilakip na sila sa sector sa mga Senior Citizens. Apan bisag senior citizens na sila daghan pa kaayo sila’g matampo sa atong katilingban. Didto sa USA adunay organisasyon ang mga retirado nga gitawag og AARP, American Association of Retired Persons. 40-million ang ilang mga miembro, ug bisan unsang mga isyu o palisiya ang pandayon sa kagamhanan konsultahon gayud sila. Sama pananglitan sa Health Care Bill nga kaniadto gipanghingusgan ni President Barack Obama. Iya gayung gisiguro nga uyonan kini sa AARP una kini niya giduso sa US Congress. Dinhi sa ato, unsa may tingog sa mga retirado? Hinaut nga hatagan pa sila sa dugang importansya ug mugnaon ang mga mapuslanong programa alang sa ilang kaayohan.
Panimalay. Matud ni Christian Morgenstern: “Home isn’t where our house is, but wherever we are understood.” Ang panimalay dili mao ang atong pinuy-anan, kon dili, didto sa lugar kung diin kita hisabti.
