USA ka kanhi sakop sa New People’s Army (NPA) nga giingong nag-operate ubos sa lider sa rebelde nga si Domingo Compoc ug giilang ikaduhang most wanted person sa Bohol ang gidakop sa kapulisan tungod sa kasong pagpatay ug pagsulay sa pagpatay sa Sagbayan karong bag-o.
Si Lieutenant Erick Binangbang, hepe sa Sagbayan Police Station, niingon nga ilang nasikop si John Carlo Paanod kinsa adunay warrant of arrest sa kasong murder ug unom ka ihap sa attempted murder sa iyang panimalay sa Barangay San Roque.
Gituuhan nga si Paanod lakip sa mga rebeldeng NPA nga nakig-engkwentro sa mga sundalo sa Philippine Army sa Cabacnitan, Bilar niadtong Mayo 2021, nga miresulta sa kamatayon sa lima ka komunistang gerilya ug pagkaangol sa usa ka state trooper.
Niadtong Hulyo ning tuiga, si Paanod mibahad ngadto sa mga awtoridad nga mobalik siya sa sabakan sa balaod.
Ipaubos unta siya sa reintegration protocols sa gobyerno ubos sa Enhanced Comprehensive Local Integration Program (E-Clip). Apan, si Paanod wa pormal nga maka-surrender sa mga otoridad sa wala pa ipagawas ang warrant of arrest batok kaniya.
Si Paanod gitanggong sa Sagbayan Police Station detention cell samtang nagpaabot sa pagpagawas sa kamanduan alang sa iyang pagbalhin sa Bohol District Jail sa barangay Cabawan ning syudad sa Tagbilaran. (RTB)
