“GREED (of money) is the root of all evils in the society,” suma pa.
Sa matag adlaw nga mo-abli ko sa akong FB account, kasagaran nakong mabasa o makita ang mga isyu sa korapsyon.
Ug ang mga posts sa negosyanteng si Willy Ramasola ang kanunay nakong makit-an.
Daghang mga isyu ang iyang giablihan. Seryoso. Pakatawa. Ug sagul.
Matud pa sa ubang netizens nga nagsunod sa iyang mga posts matag adlaw, makapawala kuno sa stress ang mga posts ni Willy.
Ingon si Willy, “Pero daghang ma-stress pud sa akong mga posts,” dayong buhakhak og katawa.
Magkatakdo ang among krusada ni Sir Ramasola — paphaon ang korapsyon. Ang nakalahi lang kay naa siyay kaya kon ugaling anaay mokiha niya og libel o cyber libel.
Bilib ko ni Sir Willy. Ana-a niya ang kinaiya sa usa ka Bol-anon: isog ug ana-a sa sakto ang baruganan.
Ang pagpadayon ni Sir Willy sa pag-utingkay sa mga nangaging transaksyon sa nakalabay ug kasamtangan nga administrasyon lakip na sa mga kalungsuran, naghatag og katin-awan sa mga Bol-anon sa klase sa liderato sa mga piniling lider de gobyerno.
Ana-a gayuy nangadutlan. Anaay nangasuko. Ug niapil sa kaliga ang mga dumadapig sa hingtungdang mga dagkong tawo ilabina ang mga politiko. Alegre.
Walay suweldo si Ramasola kundi boluntaryo ang iyang pagtabang, matud niya. Buhing bayani gayud.
Nganong anaay korapsyon? Simpol ra ang tubag: tungod kay daghang buaya. Daghang hakog nga mga tawo sa atong palibot.
Ang dili pagka-kontento sa kon unsay ana-a kaniya maoy kasagarang nagtukmod nganong mangurakot o mangawat ang tawo.
Daghang nakahibalo nga dako kining sala apan pabiling nibuhat gihapon tungod kay gustong mahimong gamhanan, impluwensyado ug makapalit sa tanang gusto. Makalangyaw bisan asa.
Nakaon na sa kaugalingong kahuyang ang mga hakog. Ang nakapait, lisod ng iluha ang gikaon. Hugaw.
Atong timan-an, nga ilawom sa kalibutan, tua didto ang suba sa kalayo.
Ikaw, gusto ka ba’ng moadto sa kinabuhing dayon diin tua didto ang kalipay nga walay katapusan ug dili kasakit?
Samtang ani-a pa ka aning kalibutana, nagginhawa, dili pa ulahi ang tanan aron maghinulsol sa mga salang nabuhat. Magba-o.
Ayaw ibaylo ang imong ispiritwal nga kaluwasan sa temporaryong kalipay niining lumalabay nga kalibutan.
Ayaw pakaulipon sa salapi, bahandi ug kabtangan o ubang materyal nga kalipay dinhi.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
