MIUSBAW sa 52 porsyento ang pag-abot sa mga turista sa Bohol sa unang tunga ning tuig 2022, nga nagtimaan sa makanunayon nga pagbawi sa kanhi nag-uswag nga industriya sa turismo sa lalawigan.
Gikan sa Enero hangtod Hunyo ning tuiga, 116,153 ka mga turista ang nangabot sa Bohol, gikan sa 76,570 ra sa parehas nga panahon sa miaging tuig sumnala sa gipakita ning pamantalaan sa datos sa Bohol Tourism Office (BTO).
Matod sa hepe sa BTO nga si Josephine Cabarus, ang pag-usbaw lapas sa ilang giplanohang pag-uswag karong tuiga nga anaa lang sa singko porsiyento. Iyang namatikdan nga halos tanang turista sa 112,879 mga lokal.
Samtang, 3,259 ug 15 ka langyaw nga turista ug Overseas Filipino workers, matag usa, ang nangabot sulod sa unom ka buwan.
Gipasabot ni Cabarus nga ang pagdaghan sa mga nangabot tungod sa pag-relax sa health safety protocols sa probinsiya, ilabina ang pagtangtang sa mga kinahanglanon sa pagsulod.
Ang BTO nagpaabot nga ang mga numero sa unang unom ka bulan modoble sa kataposang tunga sa tuig diin ang pandemya sa COVID-19 nakapiang sa industriya sa turismo sa Bohol.
Sa 2020, ang tuig nga nagsugod ang pandemya, ang ihap sa mga turista nga nangabot sa probinsya mius-os sa 177,341 gikan sa 1.5 milyon sa miaging tuig. (RTB)
