MIHIMO sa dinaliang aksyon si BM Tita V Baja kalabot sa viral post nga mahal nga pagkaon didto sa Virgin Island Panglao.
Ang Committee Tourism sa Sangguniang Panlalawigan nasubo sa viral post nga P26,100 nga mahal nga pagkaon nga nabayaran sa mga torista didto sa Virgin Island Panglao, Bohol.
Kini maoy gibutyag ni Board Member Tita Baja kinsa mao ang chairman sa Committee on Tourism atol sa regular session sa Sangguniang Panlalawigan kaniadotng Martes, Agosto 2.
Matod ni Baja nga personal niya nga gibisita ang lungsod sa Panglao aron makakuha og ‘first hand’ nga impormasyon ug unsa nay gihimo nga aksyon sa kagamhanang lokal sa maong issue
Dugang niya nga ang si Panglao Mayor Boy Arcay ang personal nga niadto sa Virgin Island para moimbestigar sa maong issue ug giabi-abi siya nila ni Architect Socrates Focanan nga Executive Assistant sa Mayor ug ni Vice-Mayor Noel Hormachuelos.
Base sa pakisusi ni Board Member Baja nga ang mga vendors sa Virgin Island walay permit gikan sa LGU-Panglao apan dunay gibayaran ngadto sa collection agent sa DENR ug kini nagpanghitabo sulod na sa 6 ka tuig.
Ang issue nga gi-isa ni Board Member Baja sa regular session girefer ngadto sa Committee of the Whole para sa aksyon sa Sangguniang Panlalawigan sa Bohol.
Sugod kaniadtong Agosto 3, 2022 wala nay gitugutan nga makabaligya sa bisan unsang pagkaon sulod sa virgin island.
WALAY ‘OVER-PRICING’
MIHIMAKAK ang mga food vendors sa Virgin Island sa Panglao sa pagbaligya og seafood ngadto sa mga turista sa mahal nga presyo sama sa giingo sa netizen nga mibayad sila og kapin sa P26,000 alang sa paniudto sa sikat nga tourist destination.
Si Fidel Clenista, miyembro sa Doljo Fisherman and Vendors Association, niingon nga ang kantidad naglangkob sa daghang putahe nga gisilbi sa 13 ka mga tawo nga gihatod sa isla pinaagi sa duha ka motorized nga mga bancas.
Sigon niini nga dili tinuod ang over-pricked tungod kay ang ilang baligya igo-igo ra ang presyo nga makatubo sila og gamay ug makapalit sila sa bugas.
“Kadtong lato, gi by plate to. P200 ang usa, kay butangan pa og lamas. Upat ka order nila mao ni abot og P800,” dugang niya.
Matod ni Clenista, kinahanglan nga isipon nga kinahanglan nila nga maningil labaw pa sa naandan tungod kay kinahanglan nila ang pagpalit sa ilang mga sangkap gikan sa mainland ug ihatud kini pabalik sa isla.
Matod niya nga human sa walo ka tuig nga pagpamaligya og pagkaon sa isla, unang higayon nga nakadawat sila og reklamo kalabot sa ilang presyo sa pagkaon.
Niadtong Lunes, Agosto 1 nag-post ang netizen nga si Vilma Uy og mga litrato sa pagkaon ug sa ilang unofficial bill nga sinulat sa kamot sa papel.
Matod niya nga ang mga litrato ug ang reklamo gipadala kaniya sa usa ka higala, usa ka turista nga nagbakasyon sa Bohol. Nunot sa viral post, daghan gihapong turista ang nakita sa Virgin Island.
Samtang, si Panglao Mayor Edgardo “Boy” Arcay, kinsa nisusi sa isla human nag-viral ang post, niangkon nga mahal gyud ang mga pagkaon sa maong isla.
Nahibawo nang daan si Arcay nga taas ang presyo sa isla bisan sa wala pa siya nilingkod pagka-mayor niadtong Hulyo, ug niingon nga ang mga vendors sa isla misaad kaniya nga dili magpasobra sa ilang bisita.
Sugod niadtong Agosto 3, gimanduan sa lokal nga kagamhanan sa Panglao ang pagpasirado sa tanang baligya ug gibalik ang isla isip usa lang la suruyanan ug gidili na ang tanang matang sa makaon. (RTB)
