GIBUTYAG sa Bol-anong DA assistant secretary for the Visayas Atty. Salvador Diputado, Ph.D nga labing menos 1-ka milyon nga mag-uuma gikan sa 42 ka probinsiya sa nasud ang nakabenepisyo sa Rice Competitive Enhancement Fund (RCEF) Seed Program sa gobyerno.
Sumala ni ASec. Diputado nga kapin sa 10 ka milyon nga certified seeds ang naapod-apod sa mga mag-uuma sukad sa pagpatuman sa RCEF Seed Program tulo ka tuig na ang milabay.
Midugang si Diputado nga ang mga humay nga gitamnan sa RCEF seeds moabot ug 1.5 milyones ka ektarya kada tuig.
Hangtud sa Hulyo, 1.57 ka milyon nga mga bag ang naapod-apod ngadto sa kapin sa 630,000 ka mga mag-uuma sa 731 ka mga siyudad ug munisipyo, nga adunay gibanabana nga gidak-on nga 720,000 ka ektarya alang sa 2022 wet cropping season, dugang pa ni Diputado.
Ang RCEF Seed Program nagpadayon gihapon sa pagpatuman sa 42 ka probinsya nga adunay taas nga potensyal sa pagsagop sa certified inbred seeds.
Ang RCEF-Seed provinces naglakip sa Ifugao, Kalinga, Ilocos Sur, La Union, Nueva Vizcaya, Quirino, Aurora, Bataan, Bulacan, Pampanga, Zambales, Cavite, Laguna, Quezon, Albay, Masbate ug Sorsogon sa Luzon; Aklan, Antique, Capiz, Negros Occidental, Bohol, Negros Oriental, Biliran, Samar (Western Samar), Southern Leyte sa Visayas. Para sa Mindanao, nagsilbi usab ang programa sa Zamboanga del Sur, Zamboanga Sibugay ug Lanao del Norte.
Lakip usab sa programa ang Misamis Occidental, Misamis Oriental, Davao de Oro, Davao del Norte, Davao del Sur, Davao Oriental, Sarangani, South Cotabato, Agusan del Norte, Agusan del Sur, Surigao del Sur, Lanao del Sur ug Maguindanao.
Sa laing bahin sigon ni Diputado, ang mga probinsya nga wala maapil sa RCEF giabagan sa National Rice Program. (RTB)
