NANAWAGAN ang Bohol Provincial Police Office (BPPO) sa mga establisemento sa negosyo nga mogamit sa online o pagbayad sa bangko alang sa ilang mga transaksyon imbes nga pisikal nga mangolekta og kuwarta ug ihatod kini sa lainlaing mga lungsod aron mapugngan ang mga tulisan sa pag-igo sa ilang mga kolektor ug mga drayber sa mga sakyanan sa paghatod.
Sumala pa ni BPPO spokesperson Lt. Thomas Zen Cheung nga ang sugyot nunot sa sunodsunod nga pagpanulis sa highway diin gibana-bana nga P1 milyon ang nawa sa nagkadaiyang mga establisemento atol sa siyam ka insidente sulod sa wa pay usa ka semana gikan Hulyo 19 hangtod 25.
Nanawagan usab si Cheung sa mga tag-iya sa negosyo nga magbutang og mga dash cam o closed-circuit television (CCTV) camera sa ilang mga sakyanan sa tinguha nga mapadali ang pag-ila sa mga suspek kung sila mabiktima sa padayon nga grupo sa mga tulisan.
Sa siyam ka mga tulis sa miaging semana, nakuha lang sa kapulisan ang CCTV footage sa duha ka insidente sa Loboc ug Baclayon.
Base sa imbestigasyon sa kapolisan, ang duha ka mga suspek nga nakita sa footage gikan sa Loboc mao usab ang nakadasmag sa mga delivery truck sa Duero, Getafe ug Baclayon sumala sa gipakita sa mga saksi.
Samtang posibleng ang mga tulis sa Carmen, Guindulman ug Loon maoy gihimo sa ubang mga grupo diin sigon sa kapolisan dili layo ang posibilidad nga magtinabangay ang ubang mga grupo.
Matod ni Cheung, ilang gibana-bana nga “more or less” 10 ka mga suspek ang nagpaluyo sa sunod-sunod nga pagpanulis sa miaging semana.
Sa bahin niini, ang kagamhanang probinsiyal ubos ni Gobernador Aris Aumentado nitanyag og P100,000 nga reward ngadto ni bisan kinsang tawo nga makahatag ug katuohan nga impormasyon nga mahimong mosangpot sa pagkasikop sa mga suspek. (RTB)
