MAGPADALA ang lalawigan sa Bohol og grupo sa mga emergency responders ngadto sa Abra ug sa rehiyon sa Ilocos human sa 7.3-magnitude nga linog nga nitay-og sa amihanang Pilipinas niadtong Miyerkules, Hulyo 27, 2022.
Ang hepe sa Provincial Disaster Risk Reduction and Management Office (PDRRMO) nga si Anthony Damalerio niingon nga si Gobernador Aris Aumentado nimando sa paghimo sa response team human ang Office of the Civil Defense (OCD) 7 nangayo og tabang sa mga local government units.
Ang PDDRMO sa pagkakaron nakaporma na og walo ka tawo nga team nga andam na alang sa deployment.
Ang team naglangkob sa mga personahe gikan sa TaRSIER 117 nga makahimo sa pagpahigayon sa mga pagluwas sa ibabaw ug tubig.
Dugang ni Damalerio nga magdala usab ang team og lain-laing mga rescue equipment sama sa extrication devices.
Apan matud ni Damalerio nga nagpaabot pa sila sa go-signal gikan sa OCD nga ipadala ang team sa staging area sa dakbayan sa Sugbo.
Gikan didto, ang grupo gikataho nga ibiyahe sa Ilocos Region pinaagi sa usa ka C-130 nga eroplano.
Ang team gikan sa Bohol gipaabot nga ipakatap sa mga dapit nga grabeng naigo sa linog diin nagkinahanglan og hinanaling tabang. (RTB)
