GIPAHIBALO sa buhatan sa DA Central Visayas nga walay kadaot sa agrikultura ang mga pag-ulan nga nasinati sa nilabay nga mga adlaw.
Matud pa sa pangulo niini nga si Asst. Sec. Atty. Salvador Diputado nga regular ang paghimo nila og monitoring sa tibook isla sa Kabisay-an ug ubang bahin sa nasud.
Sigon ni Diputado nga hangtud karon walay taho gikan sa mga farmer nga naay damages ug nagsige sila sa monitoring, ilabi na kung mu-prolong gyud maong weather conditions.
Nasinati ang panagsang pag-uwan ug kusog nga pag-uwan sa isla sa Visayas sa pipila ka adlaw tungod sa Southwest Monsoon o “Habagat,” nga maoy kasamtangang sistema sa panahon sa nasud.
Gipasalig hinoon sa Bol-anong asst. secretary sa DA nga kung adunay mga panghitabo o bisan unsang mga insidente nga makadaot sa produksiyon sa agrikultura, awtomatik mahatagan og pinansyal nga tabang ang mga mag-uuma alang sa ilang nadaot nga mga produkto.
Dugang sa opisyal nga ang mga utanon ang labing apektado kun adunay mahitabo nga kalamidad tungod kay kini sensitibo kaayo.
Gisundan kini sa mga punoan sa prutas nga nag-una sa mga dagkong tanom sama sa saging, lubi ug mangga.
Sa laing bahin gipadayon na usab sa nasudnong buhatan sa DA ang dugang hugna sa pag-apod apod og financial aid sa mga mag-uuma nga naapektuhan sa bagyong Odette ug uban pang mga nangaging kalamidad nga nakahatag og dakong kadaot sa ilang mga produkto sa agrikultura, sigon ni Diputado. (RTB)
