SI Gobernador Aris Aumentado nagkanayon nga ang mga Bol-anon nga wala na makigbatok sa gubat nga nahiagoman sa mga bayaning Bol-anon, apan, padayon nga nakig-gubat batok sa kakabus, corruption ug pagpanamastamas sa kalikopan.
Kini nga mensahe iyang gipalanog alang sa tanang mga Bol-anon atol sa kasaulogan sa ika-68 nga pagkahimugso sa Bohol sukad niadtong Hulyo 20, 1854 diha sa usa ka programa gahapon Hulyo 22, 2022.
“Karong adlawa, wala na kita makig-away sama sa gihimo sa atong mga bayani ug salamat sa Diyos, ania na kita sa kalinaw,” si Aumentado nagkanayon.
Apan, nakaigbugno pa kita’ sa laing klasi sa gubat, ug kini mao ang kapobrehon ug graft and corruption diha sa gobiyeno nga nagpahimulos sa katawhan nga angayan alagaran, siya midugang.
“We are fighting against the revenge of nature that is only getting back at us because we have abused and not taken care of our environment.” (Makigtigi kita sa panimalos sa kinaiyahan nga mibalos kanato tungod kay atong giabusohan kini ug wala nato kini panalipdi).
“Mao nga ang pakiggubat sa atong mga katiguwangan magpadayon,” siya midugang sa pagpatin-aw.
Matud sa gobernador nga ang pagsaulog sa foundation day sa Bohol, usa sa mga hagit nga angay atubangon sa tanan.
“Ug alang sa administrasyong Aumentado, ang usa ka limpyong panggobyerno maoy maghatod ug kalamboan alang kanatong tanan. Mao kana ang atong hiniusang pangandoy ug tinguha,” siya nagkanayon.
Si Aumentado miabi-abi ni Bise-Presidene Sara Duterte, kinsa mao ang guest of honor sa maong kasaulogan gahapon.
Kuyog sa gobernador sa entablado sa Bohol Cultural Center, Tagbilaran City, mao sila si Duterte, Bise-Gob. Victor Balite, Representante Edgar Chatto (1st dist), Congwoman Maria Vanessa Cadorna Aumentado (2nd dist), Congresswoman Alexie Besas Tutor ug senior citizen representante.
Lakip sa nanambong sa kasaulogan mao ang sakop sa Sangguniang Panlalawigan, mga mayor, ug ubang opisyales ug mga dinapit. (rvo)
